काठमाडौ, ६ जेठ ।
भूकम्पबाट अति प्रभावित ६ जिल्लामा अस्थायी बसोवास योजना निर्माणका लागि आजबाट भुगर्भविद् सहितको टोली अनुगमनका लागि जाँदैछ ।
प्रभावित जिल्लामा खटिने १८ वटा टोलीमा ३÷३ जना भुगर्भविद रहने उद्योगमन्त्री महेश बस्नेतले जानकारी दिनुभयो ।
खानी तथा भूगर्भ विभागका महानिर्देशक सर्वजीत महतोको नेतृत्वमा खानी विभाग, इसिमोड, त्रिभुवन विश्वविद्यालयका प्राध्यापक, भूगर्भविद र नेपाल भौगर्भिक समाजको प्रतिनिधि सहितको टोलीे आजदेखि भूकम्पबाट अति प्रभावित जिल्लाको स्थलगत अनुगमनमा लागि जान लागेका हुन् ।
टोलीले विनाशकारी भूकम्पबाट अतिप्रभावित जिल्ला गोरखा, सिन्धुपाल्चोक, दोलखा, रसुवा, नुवाकोट र धादिङमा स्थलगत निरिक्षण तथा स्याटेलाइट डाटाको आधारमा एक साता भित्र प्रतिवेदन पेश गर्नेेछ । उक्त प्रतिवेदनको आधारमा गृहमन्त्रालयले अस्थायी पुर्नवास कार्यक्रमको तयारी गर्ने मन्त्री बस्नेतले बताउनुभयो ।
