काठमाडौ, वैशाख २८ ।
महाभूकम्पको केन्द्रविन्दु बारपाक आसपासदेखि पूर्वको खुम्बुक्षेत्र सम्मका २० भन्दा बढी हिमताल भूकम्पको धक्काले छचल्किन वा कमजोर स्थानमा भासिनसक्ने भएकाले तल्लो तटीय क्षेत्रका बासिन्दालाई सतर्क राख्न विशेषज्ञहरूले सुझाव दिएका छन् ।
भूकम्पको झड्काले पानी बाहिरिने सम्भावना रहेकाले सम्भावित दुर्घटनाबाट बच्न बेलैमा सतर्क रहनु पर्ने काठमाडौं विश्वविद्यालयका हिमक्षेत्र जलवायु विपत् अध्ययन केन्द्रका प्रमुख डा. रिजनभक्त कायस्थले बताउनु भयो । लम्जुङ–गोरखा सीमा मनास्लुदेखि खुम्बुक्षेत्रसम्म २० भन्दा बढी हिमताल छन् ।
तीमध्ये मस्र्याङ्दी नदी प्रणालीको शिरस्थित ठुलागी, तामाकोसी नदी प्रणालीको शिरस्थित च्छो रोल्पा र दुधकोसी नदी प्रणालीको शिरस्थित इम्जा हिमताल बढी जोखिममा रहेको उहाको भनाई छ । पूर्वको तल्लो वरुण हिमताल पनि जोखिममा रहेको छ ।
अन्तर्रा्ष्ट्रिय एकीकृत पर्वतीय विकास केन्द्र (इसिमोड), जल तथा मौसम विज्ञान विभाग, त्रिभुवन विश्वविद्यालय र काठमाडौं विश्वविद्यालयले यसअघि गरेको अध्यायनले पनि हिमाली क्षेत्रका साना अरू हिमताल समेत ठूला भूकम्प आउँदा फुट्न सक्ने देखाएका छन । जलवायु परिवर्तनका कारण हिमाली क्षेत्रमा बढ्दो तापक्रम वृद्धिले त्यो खतरालाई बढाइरहेको विज्ञहरू बताउँछन ।
