काठमाण्डौ ,२७ वैशाख ।
विनाशकारी महाभूकम्पबाट प्रभावित जनतालाई नेपाल टेलिकमले २७ करोड ७५ हजार रुपैयाँ उपलब्ध गराएको छ । टेलिकमले उक्त रकम प्रधानमन्त्री दैवी प्रकोप उद्दार कोषलाई हस्तान्तरण गरेको छ ।
भूकम्प पीडितलाई उक्त रकम टेलिकम र त्यहाँ कार्यरत कर्मचारीहरुले उपलब्ध गराएका हुन् । टेलिकमको तर्फबाट २५ करोड रुपैयाँ र कर्मचारीको तलवबाट २ करोड ७५ हजार रुपैयाँ संकलन गरिएको हो ।
आज प्रधानमन्त्री सुशील कोइरालालाई भेटी टेलिकम र कर्मचारीको तर्फबाट छुट्टा(छुट्टै चेक हस्तान्तरण गरिएको छ । टेलिकमको तर्फबाट २५ करोडको चेक सूचना तथा सञ्चार सचिव सुनिलबहादुर मल्ल र कर्मचारीले संकलन गरेको २ करोड ७५ हजारको चेक प्रबन्ध निर्देशक बुद्धिप्रसाद आचार्यले हस्तान्तरण गर्नुभएको हो ।
सोही अवसरमा सञ्चालक समितिका पदाधिकारीहरुको ३ वटा बैठक भत्ता बराबरको ८१ हजार ६ सय रुपैयाँ पनि कोषमा उपलब्ध गराएको टेलिकमले जनाएको छ ।
यसैबिच भूकम्पका कारण घोषणा गरेको छ । नेपाल सरकारको निर्देशन एवं योजनाको परिधिभित्र रहेर आगामी तीन बर्ष्भित्रमा उक्त रकम खर्च गरिने टेलिकमले जनाएको छ ।
ऐतिहासिक तथा पुरातात्विक महत्वका संरचनाहरु मध्ये प्राथमिकताको आधारमा काठमाडौंको धरहरा, गोरखाको मनकामना मन्दिर, काठमाडौंको स्वयम्भुनाथ, ललितपुर र भक्तपुरको दरवार स्क्वायर र भूकम्पबाट अति प्रभावित क्षेत्रका सामुदायिक विद्यालयहरुको पुनर्निर्माणमा उक्त रकम खर्चिने टेलिकमले स्पष्ट पारेको छ ।
टेलिकमले भूकम्पका कारण घरबार गुमाई अस्थाई शिविरहरुमा बसोवास गरिरहेका भूकम्प पीडितहरुलाई आफन्तजनसँग सम्पर्क गर्न सुविधाजनक बनाउने उद्देश्यले अस्थाई शिविरहरुमा वाइफाई हटस्पट सेवा निःशुल्क रुपमा सञ्चालन गर्ने जनाएको छ ।
