बंगालको खाडीमा विकसित चक्रवात ‘अर्नब’ कमजोर भएकाले नेपालमा तीव्र हावाहुरीको सम्भावना नरहेको जल तथा मौसम विज्ञान विभाग, मौसम पूर्वानुमान महाशाखाले जनाएको छ। चक्रवात ‘अर्नब’ कमजोर भई हाल ‘बलियो न्यून चापीय क्षेत्र’को रूपमा रहेको विभागले स्पष्ट पारेको छ।
मौसम पूर्वानुमान महाशाखाकी वरिष्ठ मौसमविद् विभूति पोखरेलका अनुसार उक्त चक्रवातको प्रभावका कारण देशका केही स्थानमा हल्कादेखि मध्यम वर्षाको सम्भावना रहे पनि शक्तिशाली अवस्थामा जस्तो डरलाग्दो हावाहुरी चल्ने सम्भावना भने छैन। अन्य क्षेत्रको तुलनामा पूर्वी भूभागमा केही भारी वर्षा हुनसक्ने अनुमान गरिएको छ।
यस मौसमी प्रणालीको प्रभाव मुख्यतया बिहीबार बेलुकादेखि शनिबारसम्म रहने बताइएको छ। वरिष्ठ मौसमविद् पोखरेलले बिहीबार साँझदेखि हिमपात सुरु हुने भएकाले उच्च पहाडी तथा हिमाली क्षेत्रका बासिन्दा तथा यात्रुहरूलाई उच्च सतर्कता अपनाउन आग्रह गरेकी छन्।
साथै, जोखिमपूर्ण, पहिरो गइरहने र कच्ची सडक खण्डहरूमा यात्रा गर्दा सजगता अपनाउनुपर्ने भए पनि राम्रा र व्यवस्थित राजमार्गहरूमा भने डराउनुपर्ने अवस्था नरहेको महाशाखाले जनाएको छ।
