कात्तिक ११, काठमाडौँ । सिद्धार्थ बैंक नेपाल प्रिमियर लिग (एनपिएल) अन्तर्गत आज कीर्तिपुरस्थित त्रिवि क्रिकेट मैदानमा दुईवटा प्रतिस्पर्धात्मक खेलहरू हुँदैछन्। स्टार खेलाडीहरूको उपस्थिति र पुराना नतिजा सुधार गर्ने दाउमा रहेका टिमहरूका कारण आजका खेलहरू थप रोचक बन्नेछन्।
विराटनगर किंग्स र चितवन राइनोज
दिनको पहिलो खेलमा मध्याह्न साढे १२ बजे विराटनगर किंग्स र चितवन राइनोज भिड्दैछन्। राष्ट्रिय टोलीका कप्तान सन्दीप लामिछानेको कप्तानीमा रहेको विराटनगरमा आन्द्रे रसेल, एन्जेलो म्याथ्युज र चरिथ असलंकाजस्ता विश्वस्तरीय विदेशी खेलाडीहरू रहेका छन्। अघिल्लो सिजनको पहिलो क्वालिफायरमा सुदूरपश्चिम र दोस्रो क्वालिफायरमा लुम्बिनीसँग पराजित हुँदै फाइनल पुग्न चुकेको किंग्स यसपटक उपाधि उचाल्ने लक्ष्यसहित मैदान उत्रिनेछ।
उता, अघिल्लो सिजनमा प्लेअफ नपुगी बाहिरिएको चितवन राइनोजले भने यसपटक सिकन्दर राजा र रवि बोपाराजस्ता अनुभवी विदेशी खेलाडीहरूलाई समेटेर टोलीलाई बलियो बनाएको छ।
जनकपुर बोल्ट्स र कर्णाली याक्स
दोस्रो खेल अपराह्न साढे ४ बजे जनकपुर बोल्ट्स र कर्णाली याक्सबीच हुनेछ। पहिलो सिजनको विजेता जनकपुर दोस्रो सिजनमा भने प्लेअफसम्म पुग्न असफल भएको थियो। यसपटक मोइन अली, जिमी निसम र इफ्तिखार अहमदजस्ता बलिया विदेशी खेलाडीहरूलाई मैदानमा उतार्दै जनकपुर आफ्नो साख फर्काउन चाहन्छ।
त्यस्तै, कर्णाली याक्सले पनि डेभिड मिलर, साहिबजादा फरहान र हुसेन तलतजस्ता हस्ती खेलाडीहरू मार्फत प्रतियोगितामा बलियो चुनौती प्रस्तुत गर्ने तयारी गरेको छ।
