२० असोज, २०८३ (६ अक्टोबर, २०२६)
काठमाडौँ। संयुक्त राष्ट्रसंघीय जलवायु परिवर्तनसम्बन्धी संरचना महासन्धि (UNFCCC) को आगामी ३१औँ सम्मेलन (कोप-३१) को पूर्वसन्ध्यामा टुभालुको राजधानी फुनाफुतीमा आयोजित उच्चस्तरीय ‘प्रि-कोप लिडर्स इभेन्ट’ मा परराष्ट्रमन्त्री शिशिर खनाल नेपाली प्रतिनिधिमण्डलसहित सहभागी हुनुभएको छ।
विभिन्न राष्ट्रका राष्ट्रप्रमुख तथा सरकार प्रमुखहरूसँगै कार्यक्रममा सहभागी हुनुभएका मन्त्री खनालले पर्वतीय तथा साना टापु विकासोन्मुख राष्ट्रहरूले भोगिरहेका साझा चुनौतीबारे नेपालको स्पष्ट दृष्टिकोण प्रस्तुत गर्नुभयो। कार्यक्रमका दौरान उहाँले टुभालुका प्रधानमन्त्री फेलेटी तेओ, टोङ्गाका प्रधानमन्त्री लर्ड फाकाफानुआ र मौरिससका राष्ट्रपति धरमवीर गोखुलसँग छुट्टाछुट्टै द्विपक्षीय भेटवार्ता गर्नुभएको छ।
भेटवार्ताहरूमा हिमाली क्षेत्रमा तीव्र गतिमा भइरहेको हिमक्षय र साना टापु राष्ट्रहरूमा समुद्री सतह वृद्धिको अन्तरसम्बन्धबारे गहन छलफल भएको छ। मन्त्री खनालले हिमालय र प्रशान्त महासागरीय टापु राष्ट्रहरूको जलवायु भविष्य परस्पर जोडिएको उल्लेख गर्दै हानि-नोक्सानी कोष (Loss and Damage Fund) को प्रभावकारी कार्यान्वयन र जलवायु वित्तका प्रतिबद्धताहरू न्यायोचित रूपमा पूरा गर्न अन्तर्राष्ट्रिय समुदायसँग माग गर्नुभएको छ।
टुभालु कोस्टल एडाप्टेसन प्रोजेक्टको स्थलगत अवलोकनका क्रममा नेपाली प्रतिनिधिमण्डलले समुद्री तटीय संरक्षणका प्रविधिहरूबारे जानकारीसमेत लिएको छ। टुभालुमा नेपालको यो उच्चस्तरीय सहभागिताले जलवायु न्याय र पर्वतीय पारिस्थितिकीय प्रणालीको संरक्षणमा नेपालको अडानलाई विश्वमञ्चमा थप मजबुत बनाएको छ।
