१६ असोज, २०८३ (२ अक्टोबर, २०२६)
काठमाडौँ। प्रधानमन्त्री बालेन्द्र शाहले जननिर्वाचित सांसदहरूलाई उनीहरूको क्षमता र पृष्ठभूमिका आधारमा ‘एक्स्ट्राअर्डिनरी’ (असाधारण), ‘एभरेज’ (औसत) र ‘बिलो एभरेज’ (औसतभन्दा मुनि) गरी तीन तहमा वर्गीकरण गरेपछि उहाँकै दल राष्ट्रिय स्वतन्त्र पार्टी (रास्वपा) भित्र तीव्र असन्तुष्टि चुलिएको छ। सिंहदरबारमा आयोजित इन्जिनियर पृष्ठभूमिका सांसदहरूसँगको छलफलमा प्रधानमन्त्रीले इन्जिनियर सांसदहरूलाई मात्र ‘एक्स्ट्राअर्डिनरी’ को संज्ञा दिएपछि अन्य विधाका जनप्रतिनिधिलाई अवमूल्यन गरिएको भन्दै संसद् र पार्टीभित्र खलबल पैदा भएको हो।
प्रतिनिधिसभाको शून्य समयमा बोल्दै रास्वपाका महामन्त्री विपिन आचार्यले आफू औसत क्षमताको इन्जिनियर भए पनि इमानदार भएर काम गर्ने सबै विधाका व्यक्तिहरू असाधारण हुने टिप्पणी गर्नुभयो। आफू पनि ‘एक्स्ट्राअर्डिनरी’ बन्ने कोसिस गरिरहेको भन्दै उहाँले प्रधानमन्त्री शाहको वर्गीकरणप्रति कडा व्यङ्ग्य प्रहार गर्नुभयो। प्रतिपक्षी दल नेकपाका मुख्य सचेतक युवराज दुलालले रास्वपा सभापति रवि लामिछाने कुन तहमा पर्छन् भन्दै कटाक्ष गरेपछि रास्वपाका दीपक बोहोरा, यज्ञमणि न्यौपानेलगायतका अन्य सांसदहरूले समेत आफूहरू कुन वर्गमा परेको हो भन्दै असन्तुष्टि र अनभिज्ञता प्रकट गरेका छन्।
छलफलमा सहभागी सांसदहरू आशिष गजुरेल, सागर ढकाल, श्रीराम न्यौपाने, धर्मराज केसी, डा. राम लामा र तपेश्वर यादवले सार्वजनिक यातायात, ३ सिफ्टमा विकास निर्माण, पुँजीगत खर्च वृद्धि, जलवायु परिवर्तन र प्रतिभा पलायन रोक्नेजस्ता रचनात्मक सुझाव दिएका थिए। तर, प्रधानमन्त्री शाहले राजनीतिक परिपक्वता नदेखाई संसद्को गरिमा विपरीत अभिव्यक्ति दिएको र सभापति रवि लामिछाने समेत उहाँको पछिल्लो व्यवहारबाट असन्तुष्ट बनेको रास्वपा वृत्तमा चर्चा सुरु भएको छ।
