१४ असोज, २०८३ (३० सेप्टेम्बर, २०२६)
काठमाडौँ। आगामी चाडपर्वको मुखमा आपूर्ति शृङ्खलामा देखिएको अवरोध हटाउन तातोपानी भन्सार नाका तत्काल पुनः सञ्चालनका लागि नेपाल उद्योग वाणिज्य महासंघ र चिनियाँ दूतावासबिच घनीभूत कूटनीतिक तथा प्राविधिक छलफल भएको छ। महासंघका अध्यक्ष अन्जन श्रेष्ठ र नेपालका लागि चिनियाँ राजदूत झाङ माओमिङबिच भएको भेटवार्तामा दसैँअघि नै नाका सञ्चालनमा ल्याउन आवश्यक सहजीकरण गर्नेबारे सहमति भएको छ।
भोटेकोशी नदीमा आएको बाढीका कारण रसुवागढी-केरुङ नाकातर्फको पुल, भन्सार कार्यालय, सुख्खा बन्दरगाह (आईसीडी) तथा सीमा जोड्ने करिब ४५ किलोमिटर सडक खण्डमा क्षति पुगेपछि उत्तरी व्यापार ठप्प बनेको छ। अध्यक्ष श्रेष्ठले कोरला र रसुवागढी नाकामा अवरोध आएकाले चाडपर्वको प्रमुख व्यापारिक मौसमअघि नै व्यापारी तथा उपभोक्ता मारमा परेको भन्दै तातोपानी नाका खुलाउन आग्रह गर्नुभयो। जवाफमा राजदूत झाङले क्षतिप्रति दुःख व्यक्त गर्दै सडक तथा पूर्वाधार मर्मतका लागि चिनियाँ द्रुत कार्य टोली परिचालन गरिएको र दुवै देशका अधिकारीहरूले तातोपानीमा संयुक्त स्थलगत निरीक्षण गरिरहेको जानकारी दिनुभयो।
छलफलमा महासंघका वरिष्ठ उपाध्यक्ष सुरकृष्ण वैद्य र महानिर्देशक डा. गोपाल प्रसाद तिवारीको समेत उपस्थिति रहेको थियो। सो अवसरमा दुवै देशका निजी क्षेत्रबिच व्यापार तथा लगानीका चुनौती सम्बोधन गर्न र आर्थिक पुनरुत्थानका लागि संयुक्त व्यापार मञ्च (Joint Business Forum) आयोजना गर्ने विषयमा समेत विचार-विमर्श भएको महासंघले जनाएको छ।
