१४ असोज, २०८३ (३० सेप्टेम्बर, २०२६)
काठमाडौँ। प्रधानमन्त्री बालेन्द्र शाहले प्रतिनिधिसभामा प्रतिनिधित्व गर्ने सांसदहरूलाई राजनीतिक दलीय अडानभन्दा माथि उठेर आफ्नो विज्ञताका आधारमा मुलुकको विकासमा योगदान पुर्याउन आग्रह गर्नुभएको छ। सिंहदरबारस्थित प्रधानमन्त्री तथा मन्त्रिपरिषद्को कार्यालयमा प्रतिनिधिसभाका इन्जिनियर पृष्ठभूमिका सांसदहरूसँग भएको विशेष छलफलका क्रममा प्रधानमन्त्री शाहले दीर्घकालीन नीति र नवीन सोचमा केन्द्रित हुन आह्वान गर्नुभएको हो।
प्रधानमन्त्री शाहले प्राविधिक विषयमा जानकार सांसदहरू मुलुकको नीति निर्माण गर्ने प्रमुख ठाउँमा रहेकाले आफ्ना ज्ञान, सीप र अनुभवको अधिकतम उपयोग गर्नुपर्नेमा जोड दिनुभयो। निर्वाचनका समयमा पार्टी राजनीतिमा सक्रिय हुनु स्वाभाविक भए पनि अन्य समयमा प्राविधिक दक्षता र व्यावसायिक पहिचानलाई प्राथमिकता दिँदै देश विकासका मुद्दामा केन्द्रित हुन उहाँले सुझाव दिनुभयो।
छलफलमा सहभागी सांसदहरूलाई ‘एक्स्ट्राअर्डिनरी’ व्यक्तिको संज्ञा दिँदै प्रधानमन्त्री शाहले विशिष्ट व्यक्तिहरूले कहिल्यै घटना र व्यक्तिप्रधान कुरा नगरी सदैव नयाँ विचार र अवधारणामा काम गर्ने उल्लेख गर्नुभयो। यस्ता नयाँ अवधारणामा आधारित भएर पारदर्शी ढङ्गले काम गरे आगामी पाँच वर्षमा मुलुकको मुहार फेर्न सकिने धारणा उहाँले व्यक्त गर्नुभयो।
सो छलफलमा पूर्वाधार विकासमन्त्री सुनील लम्साल, राजनीतिक सल्लाहकार असिम शाहसहित सांसदहरू तपेश्वर यादव, जगदीश खरेल, आशीष गजुरेल, उज्ज्वलकुमार झा, अरविन्द शाह, धर्मराज केसी, श्रीराम न्यौपाने, सागर ढकाल, सुशील खड्का र डा. राम लामाको उपस्थिति रहेको थियो।
