१३ असोज, २०८३ (२९ सेप्टेम्बर, २०२६)
काठमाडौँ। संयुक्त राष्ट्रसङ्घको ८१औँ महासभामा सहभागी हुने क्रममा न्युयोर्कमा रहनुभएका परराष्ट्रमन्त्री शिशिर खनाल र श्रीलंकाका विदेश, वैदेशिक रोजगार तथा पर्यटनमन्त्री विजिथा हेराथबीच द्विपक्षीय भेटवार्ता भएको छ। महासभाको ‘साइडलाइन’ मा भएको उक्त भेटमा नेपाल र श्रीलंकाबिचको मैत्रीपूर्ण सम्बन्धलाई थप सुदृढ बनाउने विषयमा गहन छलफल भएको छ।
भेटका क्रममा परराष्ट्रमन्त्री खनालले नेपालमा हालै आएको विनाशकारी जलवायुजन्य विपद् तथा बाढी-पहिरोबाट प्रभावित समुदायप्रति सहानुभूति एवं ऐक्यबद्धता प्रकट गर्दै आर्थिक तथा मानवीय सहायता उपलब्ध गराएकोमा श्रीलंका सरकार र त्यहाँका जनताप्रति हार्दिक आभार व्यक्त गर्नुभयो।
भेटमा दुवै मन्त्रीहरूले द्विपक्षीय सम्बन्धका विविध पक्षमा विचार आदानप्रदान गर्दै विद्यमान संयन्त्रका बैठकहरू शीघ्र आयोजना गर्ने प्रतिबद्धता जनाउनुभयो। साथै व्यापार, पर्यटन, शिक्षा, संस्कृति, कनेक्टिभिटी तथा जनस्तरको सम्बन्धलगायत आपसी हितका क्षेत्रमा सहकार्यलाई अझ फराकिलो र प्रभावकारी बनाउने सहमति भएको छ।
