१२ असोज, २०८३ (२८ सेप्टेम्बर, २०२६)
काठमाडौँ। दुई दिनदेखिको अविरल वर्षाका कारण आएको पहिरोमा परी बागलुङमा १० जनाको मृत्यु भएको छ भने एक जना बेपत्ता भएका छन्। जिल्ला प्रहरी कार्यालय बागलुङका अनुसार आइतबार तमानखोला गाउँपालिकामा चार जना र निसीखोला गाउँपालिकामा पाँच जनाको पहिरोले घर र गोठ पुर्दा मृत्यु भएको हो। तमानखोला-३ धर्नासुकमा ८० वर्षीय बुद्धिराज घर्ती र ६६ वर्षीया भीमदेवी घर्ती, तमानखोला-४ सन्तरमा ५० वर्षीय हस्तवीर श्रीपाली र ६५ वर्षीया उडिसरा श्रीपालीको ज्यान गएको छ। सन्तरमा हस्तवीरकी श्रीमती पहिरोमा बेपत्ता हुनुभएको छ। यस्तै निसीखोला-३ जुग्जाखोलामा पहिरोले घर पुर्दा ३६ वर्षीया श्यामकुमारी विकसहित उहाँका तीन जना नाबालक छोराछोरीको मृत्यु भएको छ भने निसीखोला-६ मा ५० वर्षीय सूर्यबहादुर घर्ती र ताराखोला-५ मा ५९ वर्षीय मनबहादुर रोकाको पहिरोमा परी मृत्यु भएको छ।
वर्षाकै कारण तनहुँका व्यास, भानु, घिरिङ, बन्दीपुर, म्याग्दे र ऋषिङ गरी छ स्थानीय तहमा २४ घरमा क्षति पुगेको छ। प्रहरीले बाढी-पहिरोबाट विस्थापित परिवारलाई सुरक्षित स्थानमा सारेको छ। यस्तै कालीगण्डकी नदीमा आएको बाढीले तनहुँको देवघाटस्थित सीता गुफा परिसरका शौचालय, १०८ शिवलिङ्गसहितको ओमकार मूर्ति र भण्डारण गरिएका सामान बगाएको छ। प्रहरीले गुफाका ७६ वर्षीय पुजारी शिवानन्द गिरीको सकुशल उद्धार गरी सुरक्षित स्थानमा स्थानान्तरण गरेको छ।
