११ असोज, २०८३ (२७ सेप्टेम्बर, २०२६)
काठमाडौँ। नेपाली कांग्रेस (असन्तुष्ट पक्ष) १५औँ महाधिवेशन तयारी समितिका संयोजक डा. शशांक कोइरालाले पूर्वप्रधानन्यायाधीश चोलेन्द्र शमशेर जबरालाई विना कुनै स्पष्ट कारण मध्यराति नियन्त्रणमा लिइनुलाई गैरजिम्मेवारपूर्ण, अराजक र गैरकानुनी कदमको संज्ञा दिनुभएको छ।
आइतबार एक प्रेस विज्ञप्ति जारी गर्दै डा. कोइरालाले पूर्वप्रधानन्यायाधीश जस्तो सम्मानित पदमा रहेका व्यक्तिलाई आधार र प्रमाणविना हचुवाका भरमा धरपकड गरिएको भन्दै त्यसको घोर भर्त्सना गर्नुभएको छ। राज्यका निकायहरूले विधिको शासन र संवैधानिक मर्यादाको ख्याल नगरी गरेको यस प्रकारको गिरफ्तारीले विधिको शासनमाथि नै प्रश्न उठाएको उहाँको भनाइ छ।
विज्ञप्तिमा राज्य संयन्त्रको यस प्रकारको स्वेच्छाचारी र अमर्यादित शैली स्वीकार्य हुन नसक्ने भन्दै कानुनी शासनको पालना गर्न र नागरिक तथा पूर्वविशिष्ट पदाधिकारीहरूको संवैधानिक अधिकारको रक्षा गर्न सरकारसँग जोडदार माग गरिएको छ।
