२८ सेप्टेम्बर, २०२६ (१२ असोज, २०८३)
काठमाडौँ। संयुक्त राष्ट्रसङ्घको ८१औँ महासभामा सहभागी हुने क्रममा न्युयोर्क पुग्नुभएका परराष्ट्रमन्त्री शिशिर खनाल र संयुक्त अरब इमिरेट्स (यूएई) का उपप्रधानमन्त्री तथा परराष्ट्रमन्त्री शेख अब्दुल्लाह बिन जायद अल नाह्यानबीच द्विपक्षीय भेटवार्ता भएको छ। शनिबार न्युयोर्कस्थित यूएईको संयुक्त राष्ट्रसङ्घीय स्थायी नियोगमा सम्पन्न भेटमा दुई देशबीचको आपसी सम्बन्ध र सहकार्यलाई थप बलियो बनाउने विषयमा गहन छलफल भएको छ।
भेटका क्रममा परराष्ट्रमन्त्री खनालले नेपालमा हालै आएको विनाशकारी जलवायुजन्य बाढी र पहिरोपछि यूएई सरकार र जनताले प्रकट गरेको ऐक्यबद्धता, सहानुभूति तथा मानवीय सहायताप्रति आभार प्रकट गर्नुभयो। साथै, यूएई सरकारले बाढी प्रभावितहरूका लागि पछिल्लो समय घोषणा गरेको २५ मिलियन अमेरिकी डलर (करिब ३ अर्ब ८३ करोड नेपाली रुपैयाँ) बराबरको थप आर्थिक सहायताका लागि पनि नेपाल सरकार र नेपाली जनताका तर्फबाट धन्यवाद ज्ञापन गर्नुभयो।
भेटघाटमा दुई मन्त्रीबीच श्रम, द्विपक्षीय व्यापार, लगानी, पर्यटन प्रवर्धन, नवीकरणीय ऊर्जा, कनेक्टिभिटी तथा संयुक्त राष्ट्रसङ्घअन्तर्गतका बहुपक्षीय मञ्चहरूमा सहकार्य विस्तार गर्नेलगायतका विविध विषयमा महत्त्वपूर्ण विचारविमर्श भएको परराष्ट्र मन्त्रालयले जनाएको छ।
