११ असोज, काठमाडौँ। पूर्वप्रधानन्यायाधीश चोलेन्द्र शमशेर जबराको पक्राउबारे नेपाली कांग्रेसले सरकारको आधिकारिक धारणा माग गर्दै कानुनी आधार र औचित्य स्पष्ट पार्न आग्रह गरेको छ।
पार्टी प्रवक्ता देवराज चालिसेले आज एक वक्तव्य जारी गर्दै राणाको गिरफ्तारी र त्यसपछिका घटनाक्रमबारे सरकारी अधिकारीहरूबाटै परस्पर विरोधी भनाइहरू आउनु गम्भीर चिन्ताको विषय भएको बताउनुभयो। “यदि गिरफ्तारी कानुनसम्मत, आवश्यक र उचित थियो भने सरकारले त्यसको स्पष्ट कानुनी आधार र औचित्य सार्वजनिक गर्न सक्नुपर्छ,” वक्तव्यमा भनिएको छ।
कांग्रेसले संवैधानिक सर्वोच्चता, कानुनी शासन र नागरिक अधिकारको पक्षमा आफ्नो स्पष्ट प्रतिबद्धता जनाउँदै अपराध अनुसन्धानमा राज्यलाई सहयोग रहने तर प्रक्रिया पारदर्शी र जवाफदेही हुनुपर्ने उल्लेख गरेको छ। विशेष सुरक्षा चुनौती वा अनुसन्धानको असाधारण आवश्यकता परेको हो भने राज्यले त्यसको पछाडिको विश्वसनीय कारण आम नागरिकसमक्ष ल्याउनुपर्ने प्रवक्ता चालिसेको भनाइ छ।
“कसैले कानुन उल्लङ्घन गरेको भए निष्पक्ष अनुसन्धान होस् र प्रमाणका आधारमा कारबाही होस्, तर गिरफ्तारी आफैँमा दोषी भएको प्रमाण होइन,” वक्तव्यमा थप भनिएको छ।
