१० असोज, २०८३ (२६ सेप्टेम्बर, २०२६)
काठमाडौँ। संयुक्त राष्ट्रसङ्घको ८१औँ महासभामा सहभागी भई प्रधानमन्त्री बालेन शाह शनिबार स्वदेश फर्किएका छन्। महासभामा सहभागी हुन मङ्गलबार साँझ अमेरिकाको न्युयोर्क प्रस्थान गर्नुभएका प्रधानमन्त्री शाह भ्रमण सम्पन्न गरी त्रिभुवन अन्तर्राष्ट्रिय विमानस्थलमा ओर्लिएका हुन्। विमानस्थलमा आयोजित पत्रकार सम्मेलनमा परराष्ट्र मन्त्रालयका निमित्त सचिव गणेशप्रसाद ढकालले भ्रमणबाट अन्तर्राष्ट्रिय मञ्चमा नेपालको छवि र प्रतिष्ठा थप अभिवृद्धि भएको जानकारी दिए।
महासभालाई सम्बोधन गर्दै प्रधानमन्त्री शाहले भोटेकोशीको विनाशकारी बाढीलाई जलवायु सङ्कटको प्रत्यक्ष दुष्परिणामका रूपमा प्रस्तुत गर्दै हरितगृह ग्यास उत्सर्जनमा ०.१ प्रतिशतभन्दा न्यून योगदान रहेको नेपालले गम्भीर क्षति भोग्नुपरेको विषय उठाउनुभएको थियो। उहाँले जलवायु परिवर्तन मानवीय र विकासकै आपत्काल बनेकाले जोखिम न्यूनीकरणका लागि ‘हिमालयन क्लाइमेट रेसिलेन्स मेकानिजम’ स्थापना गर्न, पूर्वसूचना प्रणालीको आधुनिकीकरण गर्न र हानि तथा नोक्सानी कोषबाट अनुदानमा आधारित स्रोत सहज रूपमा उपलब्ध गराउन विश्व समुदायसँग जोडदार माग गर्नुभएको थियो।
भ्रमणका क्रममा प्रधानमन्त्री शाहले राष्ट्रसङ्घका महासचिव एन्टोनियो गुटेरेससँग उच्चस्तरीय भेटवार्ता गर्नुभएको थियो। सो अवसरमा महासचिव गुटेरेसले भोटेकोशी बाढीबाट भएको जनधनको क्षतिप्रति दुःख व्यक्त गर्दै जलवायु सङ्कटविरुद्धको लडाइँमा राष्ट्रसङ्घ नेपालको साथमा रहने प्रतिबद्धता जनाउनुभएको थियो।
