९ असोज, २०८३ (२५ सेप्टेम्बर, २०२६)
काठमाडौँ। बंगालको खाडीमा विकसित न्यूनचापीय प्रणालीको प्रभावका कारण भएको अविरल वर्षाले भिजिबिलिटी नपुग्दा पोखरा अन्तर्राष्ट्रिय विमानस्थलमा शुक्रबार दिनभर उडान तथा अवतरण प्रभावित भएको छ। पर्याप्त भिजिबिलिटी नभएपछि बुधबारदेखि नियमित उडान थालेको फ्लाई दुबईले शुक्रबारका लागि तय भएको दुबई–पोखरा–दुबई अन्तर्राष्ट्रिय उडान स्थगित गरेको छ।
विमानस्थलकी प्रवक्ता जशोदा रेग्मीका अनुसार आईएफआर (IFR) प्रविधिबाट उडान-अवतरणका लागि कम्तीमा ३,१०० मिटर र भीएफआर (VFR) का लागि ५,००० मिटर भिजिबिलिटी आवश्यक पर्नेमा सो नपुगेपछि उडान प्रभावित भएको हो। उडान रद्द हुँदा दुबईबाट पोखरा आउन लागेका ९५ जना र पोखराबाट दुबई जान लागेका ९० जना यात्रु रोकिएका छन्। दिनभर आन्तरिक उडानसमेत प्रभावित भए पनि साँझपख बुद्ध एयरका तीनवटा जहाजले काठमाडौँ–पोखरा उडान भरेका थिए।
मौसम पूर्वानुमान महाशाखाका अनुसार न्यूनचापीय प्रणालीको प्रभावले शनिबार पश्चिमी भूभागमा झनै बढी वर्षा हुने सम्भावना छ। मौसममा सुधार आउनासाथ फ्लाई दुबईसहितका आन्तरिक तथा बाह्य उडानहरू पूर्ववत् रूपमा नियमित सञ्चालन हुने विमानस्थल प्रशासनले जनाएको छ।
