काठमाडौँ। नेकपा (एमाले) का केन्द्रीय सदस्य विष्णु रिजालले सेना जस्तो राज्यको स्थायी संरचनाप्रति पार्टीको दृष्टिकोण स्पष्ट हुनुपर्नेमा जोड दिएका छन्। ललितपुरको भनीमण्डलमा जारी एमाले केन्द्रीय कमिटी बैठकमा बोल्दै रिजालले भदौ २३-२४ को घटनामा सेनाले नेतृत्वको सुरक्षा र सहजीकरण गरेको भए पनि संसद्मा एमालेको मुख्य निशाना नै सेना हो कि जस्तो गरी प्रस्तुत हुँदा भ्रम र टकराव बढेको बताएका हुन्।
बैठकमा आठबुँदे धारणा राख्दै रिजालले निर्वाचन पराजयको नैतिक जिम्मेवारी लिने अध्यक्ष केपी शर्मा ओलीको कदमको समर्थन गरे। यद्यपि, उनले पार्टीको नीति, सिद्धान्त, कार्यशैली र सधैँ सत्ताको गोलचक्करमा रुमल्लिने प्रवृत्तिको कडा समीक्षा गर्न माग गरेका छन्। ‘छैन कसैसँग शत्रुता, छ सबैसँग मित्रता’ जस्ता नारा, रास्वपासँगको अस्थिर सहकार्य, सत्ताकेन्द्रित कार्यनीति र डिजिटल मोर्चामा देखिएको सुस्तताबारे पुनःविचार गर्न उनले आग्रह गरे।
साथै, रिजालले मदन भण्डारीको शैलीमा साहसिक कदम चाल्दै एमालेको नेतृत्वमा वामपन्थी एकता र कम्युनिस्ट आन्दोलनको पुनर्गठन गर्नुपर्ने प्रस्ताव गरे। २४ सै घण्टा क्रियाशील रहने डिजिटल विभाग गठन गर्न र परम्परागत विभागहरूमा कम्तीमा ५० प्रतिशत योग्य युवा विज्ञहरूलाई स्थान दिई नयाँ पुस्तालाई आकर्षित गर्नुपर्नेमा उनले जोड दिएका छन्।
