काठमाडौँ। संयुक्त राष्ट्रसङ्घको ८१औँ महासभामा सहभागी हुन अमेरिका प्रस्थान गर्नुअघि प्रधानमन्त्री बालेन्द्र (बालेन) शाहले प्रमुख प्रतिपक्षी दल नेपाली कांग्रेसका शीर्ष नेताहरूसँग भेटघाट तथा परामर्श गरेका छन्। सिंहदरबारस्थित प्रधानमन्त्री तथा मन्त्रिपरिषद्को कार्यालयमा सोमबार भएको भेटमा कांग्रेस उपसभापति विश्वप्रकाश शर्मा र संसदीय दलका नेता भीष्मराज आङ्देम्बे सहभागी थिए।
महासभामा नेपालकोतर्फबाट प्रस्तुत गरिने विषयवस्तु र साझा धारणाका बारेमा छलफल गर्न प्रधानमन्त्रीले प्रतिपक्षी दलका प्रतिनिधिलाई आमन्त्रण गरेका थिए। भेटका क्रममा कांग्रेस सभापति गगन थापा र समग्र पार्टीको तर्फबाट तयार पारिएको धारणा प्रधानमन्त्रीसमक्ष प्रस्तुत गरिएको उपसभापति शर्माले जानकारी दिए। राष्ट्रसंघीय मञ्चमा देश एक ढिक्का रहेको सन्देश दिनुका साथै भोटेकोशीको विपद् तथा जलवायुजन्य संकटलाई अन्तर्राष्ट्रियकरण गर्दै विश्व समुदायको ध्यान आकर्षण गराउन कांग्रेसले प्रधानमन्त्रीलाई आग्रह गरेको छ।
प्रधानमन्त्री शाह भोलि मंगलबार अपराह्न संयुक्त राष्ट्रसङ्घको महासभामा भाग लिन नेपाली प्रतिनिधिमण्डलको नेतृत्व गर्दै अमेरिकाको न्युयोर्कतर्फ प्रस्थान गर्ने कार्यक्रम रहेको छ।
