काठमाडौँ। प्रतिनिधिसभाको कार्यव्यवस्था परामर्श समितिको बैठक आज मध्याह्न १२:१५ बजे सिंहदरबारस्थित प्रतिनिधिसभा कक्ष नजिकैको कार्यव्यवस्था हलमा बस्दैछ।
बैठकमा रसुवा, भोटेकोशी र त्रिशूली क्षेत्रमा भएको भीषण विपद् तथा जलवायु परिवर्तनका असरहरूबारे अनुगमन र अध्ययन गर्न संसदीय विशेष समिति गठन गर्ने विषयमा छलफल हुने मुख्य कार्यसूची रहेको छ। यसअघि नै भोटेकोशी विपद्पछिको खोज, उद्धार, राहत, पुनर्स्थापना र पुनर्निर्माणको अनुगमन गर्न तथा भविष्यमा मानवीय र भौतिक क्षति न्यूनीकरणका लागि सरकारलाई नीतिगत सुझाव दिन यस्तो विशेष समिति बनाउने निर्णय भइसकेको थियो।
समितिलाई विपद् पूर्वतयारी, पूर्वसूचना प्रणाली, दिगो पूर्वाधार पुनर्निर्माण र विपद् व्यवस्थापनसम्बन्धी कानुनी व्यवस्थाका विषयमा काम गर्ने अधिकार र जिम्मेवारी तोक्ने प्रस्ताव गरिएको छ। यद्यपि, समितिको सदस्य सङ्ख्या, कार्यक्षेत्र, कार्यावधि र संयोजकका विषयमा राजनीतिक दलहरूबिच सहमति जुट्न बाँकी रहेकाले प्रक्रियामा ढिलाइ हुँदै आएको छ। आजको बैठकमा तिनै विषयहरू टुङ्ग्याएर विशेष समिति गठन प्रक्रियालाई अन्तिम रूप दिने तयारी छ।
