काठमाडौँ। पूर्वराष्ट्रपति विद्यादेवी भण्डारीले नेपाल भौगोलिक र राजनीतिक दुवै हिसाबले अत्यन्तै संवेदनशील क्षेत्रमा अवस्थित रहेको बताएकी छन्। शनिबार काठमाडौँमा आयोजित ‘हिमाल, जलवायु र विपद् अन्तरसंवाद’ कार्यक्रमलाई सम्बोधन गर्दै उनले ठूला जनसङ्ख्या र तीव्र विकास हासिल गरेका छिमेकी मुलुकहरूको बीचमा नेपाल रहेकाले देशका समस्या र आवश्यकताप्रति गम्भीर हुनुपर्नेमा जोड दिइन्।
पूर्वराष्ट्रपति भण्डारीले नेपालका दुई ठूला छिमेकी मुलुकहरूको जनसङ्ख्या झन्डै डेढ-डेढ अर्ब पुग्न लागेको उल्लेख गर्दै करिब तीन करोड जनसङ्ख्या भएको नेपालले आफ्नो भौगोलिक तथा राजनीतिक संवेदनशीलतालाई दीर्घकालीन नीतिमार्फत सम्बोधन गर्नुपर्ने बताइन्। दुवै छिमेकी देशहरूले सामान्य सहयोग मात्र गरिदिए पनि नेपालका धेरै समस्याहरू सहजै समाधान हुनसक्ने उनको भनाइ थियो।
प्राकृतिक सुन्दरता र महत्त्वका हिसाबले नेपाल धनी भए पनि विपद् तथा अन्य समस्याहरूको दीर्घकालीन समाधान खोज्न नसक्दा पटक-पटक सास्ती व्यहोर्नु परेको उनले उल्लेख गरिन्। तत्कालीन समस्या समाधानमा मात्र अल्झिनुको सट्टा विपद् व्यवस्थापन र देशका दीर्घकालीन चुनौतीहरू सामना गर्न राज्यको ध्यान केन्द्रित हुनुपर्नेमा पूर्वराष्ट्रपति भण्डारीले जोड दिइन्।
