काठमाडौँ। भारतको तीनदिने औपचारिक भ्रमणमा रहेका अर्थमन्त्री डा. स्वर्णिम वाग्लेले नेपाल-भारतबिचको आर्थिक तथा रणनीतिक साझेदारीलाई मजबुत बनाउन भौतिक, डिजिटल र ऊर्जा सञ्जाल (कनेक्टिभिटी) विस्तारका साथै भारतीय लगानी बढाउनुपर्ने विषयलाई प्राथमिकताका साथ उठाएका छन्।
नयाँ दिल्लीस्थित इन्डिया इन्टरनेसनल सेन्टरमा आयोजित उच्चस्तरीय कूटनीतिक गोलमेच बैठकलाई सम्बोधन गर्दै अर्थमन्त्री वाग्लेले नेपालको व्यापार घाटा घटाउन र गैरभन्सार अवरोधहरू हटाउन दुई देशबिचको व्यापार सन्धि पुनरावलोकन गर्नुपर्ने आवश्यकता औँल्याए। ऊर्जा, उत्पादनमूलक उद्योग र प्रविधि क्षेत्रमा भारतीय लगानी आकर्षित गर्न नीतिगत तथा कानुनी सुधार भइरहेको बताउँदै उनले हरित वित्त र सहुलियतपूर्ण वित्तीय उपकरणको उपयोगमा जोड दिए।
छलफलका क्रममा अर्थमन्त्री वाग्लेले हालैको प्राकृतिक विपद्मा भारतले गरेको सहयोगप्रति आभार व्यक्त गर्दै जलवायु न्यायका लागि अन्तर्राष्ट्रिय मञ्चहरूमा भारतसँग सहकार्य गर्ने इच्छा व्यक्त गरे। उक्त गोलमेच बैठकमा भारतका पूर्व विदेश सचिव श्याम शरण, पूर्व राष्ट्रिय सुरक्षा सल्लाहकार शिवशंकर मेनन, पूर्व उपराष्ट्रिय सुरक्षा सल्लाहकार पंकज शरण, सांसद जयराम रमेश, पूर्वराजदूत रञ्जीत राय, भाजपाका विदेश मामिला प्रमुख डा. विजय चौथाइबालेलगायतका उच्चस्तरीय कूटनीतिज्ञ तथा विज्ञहरूको उपस्थिति रहेको थियो।
