काठमाडौँ। नेकपा (एमाले) को निर्वाचन समीक्षा तथा पार्टी पुनर्गठन कार्यदलको दुई दिनसम्म काभ्रेको बल्थलीमा बसेको आवासीय बैठकमा प्रतिवेदनबारे अन्तिम सहमति जुट्न सकेको छैन। दुवै भिन्न प्रतिवेदनमा सहमति नजुटेपछि तिनलाई समेटेर एउटै साझा प्रतिवेदन तयार पार्ने जिम्मेवारी तीन वरिष्ठ नेतालाई दिइएको छ।
पार्टी पुनर्गठनका लागि कार्यदलका सदस्य सचिव शंकर पोखरेलले तयार पारेको प्रारम्भिक प्रतिवेदनमा अध्यक्ष केपी शर्मा ओलीले मार्गप्रशस्त गर्नुपर्ने प्रस्ताव उल्लेख भएपछि विवाद उत्पन्न भएको थियो। अध्यक्ष ओलीको असहमतिपछि कार्यदलका संयोजक रामबहादुर थापा ‘बादल’ लाई अर्को प्रतिवेदन लेख्न लगाइएको थियो। बल्थली बैठकमा दुवै प्रतिवेदन पेस गरी सहमति खोज्ने प्रयास गरिए पनि नेताहरूबीच मतैक्यता हुन सकेन।
एमाले सचिव लेखराज भट्टका अनुसार दुवै मस्यौदा र सदस्यहरूबाट प्राप्त सुझावहरूलाई समेटेर एकीकृत प्रतिवेदन बनाउन संयोजक बादल, सदस्य विष्णुप्रसाद पौडेल र सदस्य सचिव पोखरेललाई दुई दिनको समयावधि दिइएको छ। तीन नेताले तयार पार्ने प्रतिवेदन कार्यदलको आगामी बैठकले पारित गरी एमाले केन्द्रीय सचिवालयसमक्ष पेस गर्ने जनाइएको छ।
