चीनको प्रमुख गुप्तचर निकाय राज्य सुरक्षा मन्त्रालय (एमएसएस) ले तीव्र गतिमा विकसित भइरहेको आर्टिफिसियल इन्टेलिजेन्स (एआई) प्रविधिको दुरुपयोगबाट देशको राजनीतिक, सामाजिक, साइबर तथा सैन्य सुरक्षामा गम्भीर खतरा उत्पन्न हुन सक्ने चेतावनी दिएको छ। मन्त्रालयले पहिलोपटक सार्वजनिक रूपमा एआईबाट उत्पन्न हुनसक्ने राष्ट्रिय सुरक्षा जोखिमबारे विस्तृत धारणा सार्वजनिक गरेको फाइनान्सियल टाइम्सले जनाएको छ।
राज्य सुरक्षा मन्त्री चेन यीशिनका अनुसार शत्रुतापूर्ण शक्ति तथा गलत नियत भएका व्यक्तिहरूले जेनेरेटिभ एआई, डीपफेक अडियो-भिडियो र ‘इन्टेलिजेन्ट ट्रोल आर्मी’ को प्रयोग गरी ठूलो परिमाणमा राजनीतिक अफवाह र विभाजनकारी सूचना फैलाइरहेका छन्। चीनमाथि जनमत र धारणाको स्तरमा ‘कग्निटिभ वारफेयर’ (मानसिक युद्ध) सञ्चालन गर्न एआई प्रयोग भइरहेको र यसले देशको वैचारिक तथा संस्थागत सुरक्षामा प्रत्यक्ष चुनौती खडा गरेको मन्त्री चेनले उल्लेख गरेका छन्।
अमेरिकी एआई कम्पनी एन्थ्रोपिकका सीईओ डारियो अमोदेई, ओपनएआईका साम अल्टम्यान र इलन मस्कले एआई विकासको गति नियन्त्रण गर्नुपर्ने बहस चलाइरहेका बेला चिनियाँ सञ्चारमाध्यम ग्लोबल टाइम्सले भने यसलाई भूराजनीतिक स्वार्थ प्रेरित कदम भन्दै आलोचना गरेको छ। विदेशी एआई मोडल र उपकरणको प्रयोगबाट संवेदनशील सरकारी तथा औद्योगिक सूचना चुहिन सक्ने जोखिम औँल्याउँदै चीनले संवेदनशील क्षेत्रमा विदेशी एआई प्रविधिको प्रयोगमा थप कडाइ गर्ने संकेत दिएको छ। आगामी सेप्टेम्बरको अन्त्यतिर अमेरिकी राष्ट्रपति डोनाल्ड ट्रम्प र चिनियाँ राष्ट्रपति सी चिनफिङबीच हुने भेटवार्तामा पनि एआई सुरक्षा मुख्य एजेन्डा बन्ने अपेक्षा गरिएको छ।
