काठमाडौँ। नवनियुक्त उद्योग, वाणिज्य तथा आपूर्तिमन्त्री दीपक साहले पद तथा गोपनीयताको शपथ ग्रहणलगत्तै सिंहदरबारस्थित मन्त्रालय पुगेर पदभार ग्रहण गरेका छन्। बिहीबार साँझ शीतल निवासमा आयोजित समारोहमा शपथ लिएपछि उनी सिधै मन्त्रालय पुगेका हुन्।
पदभार सम्हालेलगत्तै सञ्चारकर्मीहरूसँग कुरा गर्दै मन्त्री साहले काठमाडौँ उपत्यकालगायत बजारमा देखिएको एलपी ग्यास अभावको समस्या समाधान गर्न र आगामी योजना बनाउन निवर्तमान मन्त्री गौरीकुमारी यादव तथा मन्त्रालयका उच्च कर्मचारीहरूसँग छलफल गरेर अघि बढ्ने बताएका छन्।
अहिले नवनियुक्त मन्त्री साह मन्त्रालयका अधिकारीहरूसँग बजारको मौज्दात र आपूर्तिको वर्तमान अवस्थाबारे छलफलमा जुटिसकेका छन्। उपत्यकामा ग्यास आपूर्ति र व्यवस्थापनको विषयलाई लिएर उत्पन्न विवादका कारण पूर्वमन्त्री यादवले राजीनामा दिएपछि प्रधानमन्त्री वालेन्द्र शाहको सिफारिसमा सुनसरी क्षेत्र नम्बर ४ का सांसद साहलाई उद्योग मन्त्रीमा नियुक्त गरिएको हो।
