काठमाडौँ। नेकपा (एमाले) को निर्वाचन समीक्षा तथा पार्टी पुनर्गठन कार्यदलको बैठक शुक्रबार बिहान ११ बजे पार्टी केन्द्रीय कार्यालय च्यासलमा बस्ने भएको छ। प्रतिवेदन लेखनको कार्यलाई अन्तिम रूप दिनका लागि गत असार २३ गतेपछि पहिलोपटक कार्यदलको बैठक बस्न लागेको हो।
कार्यदलका सदस्य-सचिव एवं महासचिव शंकर पोखरेलले तयार पारेको ६५ पृष्ठ लामो प्रतिवेदनमा गत निर्वाचनमा व्यहोरेको पराजयको मुख्य जिम्मेवारी अध्यक्ष केपी शर्मा ओलीले लिँदै पदबाट मार्गप्रशस्त गर्नुपर्ने र पार्टीको विशेष महाधिवेशन बोलाउनुपर्नेजस्ता गम्भीर सुझावहरू समावेश गरिएका छन्।
तर, उक्त प्रतिवेदनको निष्कर्षप्रति तीव्र असन्तुष्टि जनाउँदै अध्यक्ष ओलीले कार्यदलका संयोजक एवं वरिष्ठ उपाध्यक्ष रामबहादुर थापा ‘बादल’ लाई प्रतिवेदन पुनर्लेखन गर्न निर्देशन दिएका थिए। सोही निर्देशन र असन्तुष्टिका बीच शुक्रबार बस्न लागेको कार्यदलको बैठकलाई एमालेभित्रको भावी राजनीतिक दिशा र शक्ति सन्तुलनका हिसाबले निकै चासोका साथ हेरिएको छ।
