काठमाडौं, २३ भदौ । पूर्वप्रधानमन्त्री सुशीला कार्कीले सुशासन नभएमा संसद्को दुई तिहाइ बहुमतले पनि स्थिरता दिन सक्दैन भन्ने स्पष्ट सन्देश जेनजी आन्दोलनले राज्य र राजनीतिक नेतृत्वलाई दिएको बताएकी छन्।
जेनजी आन्दोलनको एक वर्ष पूरा भएको अवसरमा मंगलबार सामाजिक सञ्जालमार्फत सन्देश जारी गर्दै उनले राजनीतिक स्थायित्व संसदीय गणितले नभई शासकको चरित्र र कार्यशैलीले निर्धारण गर्ने स्पष्ट पारेकी हुन्। उनले सुशासन, भ्रष्टाचार नियन्त्रण, विधिको शासन र नागरिकको सम्मान सुनिश्चित गर्न सरकारले प्रभावकारी काम गर्नुपर्ने अपेक्षा गरेकी छन्।
आन्दोलनका क्रममा भएको जनधनको क्षति र त्यसबाट सिर्जित पीडालाई स्मरण गर्दै कार्कीले भविष्यमा त्यस्तो घटना फेरि दोहोरिन नदिन र जनतालाई फेरि सडकमा आउनुपर्ने अवस्था सिर्जना हुन नदिन सबै पक्ष जिम्मेवार बन्नुपर्नेमा जोड दिएकी छन्। साथै, आन्दोलनमा ज्यान गुमाएका युवाहरूप्रति श्रद्धाञ्जली अर्पण गर्दै घाइतेहरूको शीघ्र स्वास्थ्यलाभको कामना गरेकी छन्।
जेनजी आन्दोलनको घाउमाथि मुलुक अहिले भोटेकोशी बाढीको पीडादायी अवस्थाबाट समेत गुज्रिरहेको उल्लेख गर्दै उनले विपद्को यस दुःखद घडीमा एकअर्काको सहारा बन्दै धैर्य र एकताका साथ सामना गर्न आह्वान गरेकी छन्।
