काठमाडौँ। नेपाल भ्रमणमा रहेका दक्षिण कोरियाका विदेशमन्त्री चो ह्युन र परराष्ट्रमन्त्री शिशिर खनालबिच सिंहदरबारस्थित परराष्ट्र मन्त्रालयमा द्विपक्षीय भेटवार्ता भएको छ। आइतबार भएको भेटमा भदौ १० गतेको भोटेकोसी बाढीपछि जारी खोज, उद्धार, राहत तथा पुनर्निर्माणसहित दुई देशबिचको द्विपक्षीय सम्बन्धका विविध विषयमा गहन छलफल भएको हो।
भेटका क्रममा बाढीमा परी बेपत्ता भएका दक्षिण कोरियाली नागरिकको खोजी तथा उद्धारबारे गम्भीर छलफल भएको थियो। परराष्ट्रमन्त्री खनालले बाढीपछि खोज तथा उद्धारका लागि कोरियाली अन्तरनिकाय द्रुत प्रतिकार्य टोली, ‘कोरिया डिजास्टर रिलिफ टिम’ र मानवीय सहायता पठाएकोमा दक्षिण कोरिया सरकारप्रति हार्दिक आभार व्यक्त गरे। मन्त्री खनालले बाढीपछिको पुनर्निर्माणलाई सरकारले उच्च प्राथमिकतामा राखेको र ‘बिल्ड ब्याक बेटर’ (Build Back Better) अवधारणाअनुसार दिगो पूर्वाधार निर्माणमा कोरियाली सहयोग निरन्तर रहने विश्वास व्यक्त गरे।
दक्षिण कोरियाका विदेशमन्त्री चो ह्युनले नेपालको पुनर्निर्माण तथा पुनःस्थापनामा सहयोग गर्न कोरिया इच्छुक रहेको बताए। जलवायु परिवर्तनका कारण नेपालजस्ता हिमाली मुलुकले भोग्नुपरेको जनधन र पूर्वाधारको क्षतिप्रति अन्तर्राष्ट्रिय समुदायको ऐतिहासिक जिम्मेवारी रहेको औँल्याउँदै मन्त्री चोले जलवायु न्याय र क्षतिपूर्तिका लागि संयुक्त राष्ट्रसंघीय जलवायु सम्मेलन (COP) लगायतका अन्तर्राष्ट्रिय मञ्चहरूमा नेपालसँगै आवाज उठाउने र वित्तीय सहयोगका लागि पहल गर्ने प्रतिबद्धता व्यक्त गरे।
छलफलका क्रममा दुवै मन्त्रीहरूले श्रम, विकास साझेदारी, व्यापार, लगानी, प्रविधि र जनस्तरको सम्बन्धलाई अझ सुदृढ बनाउँदै नेपाल-कोरिया मैत्रीपूर्ण सम्बन्धलाई नयाँ उचाइमा पुर्याउने प्रतिबद्धता जनाएका छन्।
