काठमाडौँ। बाढी प्रभावित क्षेत्रमा शव पहिचान र राहत कार्यमा सहयोग पुर्याउन चीनले आकस्मिक सहायताको तेस्रो खेप नेपाल पठाएको छ। चिनियाँ जनमुक्ति सेना (PLA) को विशाल ट्रान्सपोर्ट एयरक्राफ्ट ‘वाई-२०ए’ (Y-20A) जहाजमार्फत उक्त सामग्री तथा विशेषज्ञ टोली बिहीबार काठमाडौँ अवतरण गरेको हो।
नेपालका लागि चिनियाँ राजदूत झाङ माओमिङ र शिक्षा, विज्ञान तथा प्रविधिमन्त्री महावीर पुनको उपस्थितिमा त्रिभुवाहन अन्तर्राष्ट्रिय विमानस्थलमा ती राहत सामग्री हस्तान्तरण तथा चिनियाँ विज्ञहरूलाई स्वागत गरिएको थियो। चीनले यस खेपमा १० जना फरेन्सिक विज्ञहरूसहित मर्चरी फ्रिजर, महामारी रोकथामका सामग्री र दैनिक अत्यावश्यक वस्तुहरू पठाएको छ। फरेन्सिक विज्ञको यो चौथो ब्याचले रसुवा तथा अन्य बाढी प्रभावित क्षेत्रमा पहिचान हुन नसकेका शवहरूको पहिचान प्रक्रियामा नेपाली टोलीलाई सहयोग गर्नेछ।
यसैबिच, बाढीका कारण मुख्य राजमार्गका धेरै पक्की पुलहरू बगेपछि चीनले घोषणा गरेको ३० वटा बेलिब्रिजमध्ये पहिलो ब्याच कोरला नाकानजिकै चिनियाँ सीमामा आइपुगेको छ। मुस्ताङस्थित लिजी–नेचुङ सीमा बन्दरगाहमा ती बेलिब्रिजहरू छिट्टै नेपाली पक्षलाई हस्तान्तरण गरिने काठमाडौँस्थित चिनियाँ दूतावासले जनाएको छ।
