काठमाडौँ, भदौ १६ — नेपालको रसुवा क्षेत्रमा आएको भीषण बाढीका कारण बेपत्ता भएकाहरूको खोजी कार्य जारी रहेका बेला भारतको उत्तर प्रदेशस्थित कुशीनगर हुँदै बग्ने गण्डक (नारायणी) नदीमा १३ वटा अज्ञात शव फेला परेका छन्।
कुशीनगर जिल्ला प्रशासनका अनुसार नदीमा भेटिएका ती शवहरूमा ६ पुरुष र ७ महिला रहेका छन्। शवहरूको व्यवस्थापनका लागि ६ वटा शव कुशीनगर मेडिकल कलेजको शवगृहमा राखिएको छ भने बाँकी ७ वटा शव गोरखपुर एम्स पठाइएको छ।
घटनाको गम्भीरतालाई मध्यनजर गर्दै भारतीय प्रशासनले एसडिआरएफ (SDRF) र एनडिआरएफ (NDRF) को टोलीमार्फत नदीमा निरन्तर खोजी तथा उद्धार कार्य जारी राखेको छ। थप शव फेला पर्न सक्ने सम्भावनालाई ध्यानमा राखी सुरक्षाकर्मीहरू उच्च सतर्कतामा छन्।
कुशीनगरकी प्रमुख जिल्ला अधिकारी वन्दिता श्रीवास्तवले तोकिएको कानुनी र प्रशासनिक प्रक्रियाअनुसार सबै कदम चालिएको जानकारी दिएकी छिन्। उनका अनुसार नेपालबाट आएका आफन्त तथा नागरिकहरूलाई सहयोग पुर्याउन स्थानीय प्रशासनले एक विशेष नियन्त्रण कक्ष (कन्ट्रोल रुम) समेत स्थापना गरेको छ।
भारतीय विदेश मन्त्रालयमार्फत नेपाल सरकारसँग समन्वय भइरहेको र पोस्टमार्टम लगायतका सम्पूर्ण प्रक्रिया पूरा भएपछि बरामद गरिएका सबै शवहरू नेपाल पक्षलाई औपचारिक रूपमा हस्तान्तरण गरिने प्रशासनले जनाएको छ।
