काठमाडौँ । सर्वोच्च अदालतको परमादेशपछि रिहा भएका पत्रकार किशोर श्रेष्ठले आफू सत्ताविरुद्ध लेखेकै कारण पक्राउ र हिरासतको अवस्था भोग्नुपरेको बताएका छन् । रिहा भएपछि सञ्चारकर्मीसँग कुरा गर्दै श्रेष्ठले सत्ताविरुद्ध लेखेकै कारण सजाय भोग्नुपरेको दाबी गर्दै भने ‘म हारेको छैन । म हार्दिनँ । म नमरेसम्म मैले देखेको कुरा लेख्न छाड्दिनँ । लेखिरहन्छु ।’
श्रेष्ठले आफूलाई पक्राउ गरेर अनुसन्धान गर्नुको साटो मानसिक दबाब दिने काम भएको आरोप लगाए । उनले भने ‘सोधपुछ नै भएन । लगेर थुन्ने र अरू मुद्दाहरू लगाउने उद्देश्य थियो । ’
उनले आफू यसअघि पनि पटक–पटक जेल बसेको उल्लेख गर्दै पछिल्लो घटनामा पनि । गौरीबहादुर कार्की नेतृत्वको प्रतिवेदन दबाइएको अवस्थामा आफूले सार्वजनिक गरेको र त्यसप्रति केही व्यक्तिहरू असन्तुष्ट रहेको उनको भनाइ थियो ।
उनले आफ्नो कार्यालय र घरबाट कम्प्युटर तथा बालबच्चाको ल्यापटपसमेत लैजानुपर्ने कारणबारे प्रश्न उठाए । आफूले कुनै व्यक्तिको फोटो नभई समाचार प्रकाशित गरेको उनको स्पष्टोक्ति थियो ।
श्रेष्ठले आफूलाई व्यक्तिगत रूपमा कसैप्रति गुनासो नरहेको बताउँदै नयाँपन देखाउने भनेर आएकाहरुले त्यसलाई व्यवहारमा उतार्न आग्रहसमेत गरे ।
आफू नहारेको र जीवन रहेसम्म आफूले देखेका विषय लेख्न नछाड्ने बताए ।
