काठमाडौँ। भारतका लागि पूर्वनेपाली राजदूत प्राध्यापक हर्षनारायण धौभडेलको ९० वर्षको उमेरमा निधन भएको छ। लामो समयदेखि पार्किन्सन्स रोगबाट पीडित प्रा. धौभडेलको क्यानडाको क्यालगरीमा निधन भएको हो।
अस्पतालमा थप उपचार सम्भव नभएपछि उनलाई क्यानडामै रहेकी छोरी निशाको घरमा राखिएको थियो। सोही क्रममा उनको निधन भएको पारिवारिक स्रोत (ज्वाइँ ज्योति वैद्य) ले जानकारी दिएका छन्। उनका चार छोरीमध्ये तीन जना क्यानडा र एक जना अमेरिकामा बसोबास गर्दै आएका छन्।
कूटनीतिक र शैक्षिक योगदान
तत्कालीन नेकपा एमालेको सरकारले वि.सं. २०५१ साल माघ १८ गते उनलाई भारतका लागि नेपाली राजदूत नियुक्त गरेको थियो। आफ्नो कार्यकालमा नेपाल र भारतबीचको द्विपक्षीय सम्बन्ध विस्तार तथा सुधारमा उनले महत्त्वपूर्ण भूमिका निर्वाह गरेका थिए।
प्रा. धौभडेलले संयुक्त राज्य अमेरिकाको ओरेगन विश्वविद्यालयबाट शिक्षा विषयमा स्नातकोत्तर गरेका थिए।
