धनगढी। सुदूरपश्चिम प्रदेशको मुख्यमन्त्री पदका लागि नेपाली कम्युनिस्ट पार्टी (नेकपा) संसदीय दलका नेता खगराज भट्टले दाबी पेस गरेका छन्।
नेकपा एमालेको समर्थनमा नेता भट्टले शुक्रबार बिहान प्रदेश प्रमुखसमक्ष मुख्यमन्त्रीका लागि आफ्नो दाबी पेस गरेका हुन्। प्रदेश प्रमुखले नयाँ सरकार गठनका लागि दिएको समयसीमाभित्रै उनले बहुमत सांसदको समर्थनसहित निवेदन दर्ता गराएका हुन्।
५३ सदस्यीय सुदूरपश्चिम प्रदेशसभामा सरकार गठनका लागि २७ सांसदको समर्थन आवश्यक पर्दछ। हाल प्रदेशसभामा नेकपासँग (निलम्बित सांसदबाहेक) २० जना र नेकपा एमालेसँग ११ जना सांसद रहेका छन्। एमालेको समर्थनसँगै भट्टको पक्षमा ३१ सांसदको प्रस्ट बहुमत पुगेको छ।
आवश्यक बहुमत पुगेसँगै भट्ट सुदूरपश्चिमको मुख्यमन्त्री बन्ने निश्चित भएको छ। उनको नियुक्ति र पद तथा गोपनीयताको शपथ आजै गराउने तयारी भइरहेको छ।
