विराटनगर। पछिल्लो तीन आर्थिक वर्षमा कोशी प्रदेश प्रहरी कार्यालयले अपराध अनुसन्धान, अदालतको फैसला कार्यान्वयन र सिमानाकामा हुने चोरी-तस्करी नियन्त्रणमा महत्त्वपूर्ण सफलता हासिल गरेको छ।
प्रदेश प्रहरी कार्यालय विराटनगरले सार्वजनिक गरेको तीन वर्ष (आ.व. २०८०/८१ देखि २०८२/८३ सम्म) को प्रगति विवरण अनुसार यस अवधिमा कूल २८ हजार ७ सय ११ वटा मुद्दा दर्ता भएका छन् भने विभिन्न अपराधमा संलग्न २२ हजार ९ सय ३२ जना प्रतिवादीलाई पक्राउ गरी कानुनी दायरामा ल्याइएको छ।
फैसला कार्यान्वयन र राजस्व सङ्कलनमा तीव्रता
अदालतबाट सजाय ठहर भई फरार रहेका अभियुक्तहरूलाई पक्राउ गरी फैसला कार्यान्वयन गराउने अभियानमा प्रहरीले उल्लेखनीय सफलता पाएको छ। तीन वर्षको अवधिमा १० हजार ५ सय १ जना फरार प्रतिवादीहरूलाई पक्राउ गरिएको छ। उनीहरूबाट कूल ४ हजार १४६ वर्षभन्दा बढी कैद सजाय भुक्तान गराउनुका साथै १ अर्ब १५ करोड ६५ लाख रुपैयाँभन्दा बढी जरिवाना रकम असुल गराइएको छ।
यसैगरी, खुल्ला सिमानाकाबाट हुने illegal/अवैध चोरी-तस्करी रोक्न प्रहरीले चलाएको कडा अपरेसनबाट तीन वर्षमा ५२ करोड ४६ लाख रुपैयाँभन्दा बढीको भन्सार राजस्व सङ्कलन भई दाखिला भएको छ।
लागूऔषध नियन्त्रणमा व्यापक कडाइ
प्रदेशभित्र हुने लागूऔषधको अवैध ओसारपसार र कारोबार नियन्त्रणमा प्रहरी आक्रामक रूपमा प्रस्तुत भएको छ। ३ वर्षमा ६ हजार ६ सयभन्दा बढी व्यक्ति र ५ सयभन्दा बढी सवारी साधन नियन्त्रणमा लिइएको छ। सो क्रममा ६५ हजार किलोग्रामभन्दा बढी गाँजा, १९ किलोग्रामभन्दा बढी ब्राउन सुगर र २१ लाखभन्दा बढी मनोद्विपक चक्की/क्याप्सुल जफत गरिएको छ। साथै, आ.व. २०८२/०८३ मा मात्रै १ हजार ३ सय ९४ रोपनी क्षेत्रफलमा लगाइएको २ लाख ६४ हजारभन्दा बढी अवैध गाँजाका बोटहरू नष्ट गरिएको प्रहरीले जनाएको छ।
पर्यटन र जनसेवा प्रवर्द्धन
प्रदेशका पर्यटकीय तथा धार्मिक स्थलहरूको सुरक्षाका लागि ७ वटा प्रमुख स्थानहरूमा ‘पर्यटक प्रहरी सहायता कक्ष’ सञ्चालनमा ल्याइएको छ। सुनसरीको बराहक्षेत्र, इलामको श्री अन्तु, धनकुटाको भेडेटार, मोरङको रानी, खोटाङको हलेसी, तेह्रथुमको बसन्तपुर र ताप्लेजुङको पाथिभरामा पर्यटक प्रहरी खटाइएको छ। हाल प्रदेशभर दैनिक रूपमा ६ हजार ३ सय २६ जना प्रहरी जनशक्ति सुरक्षा र गस्तीका लागि परिचालन हुने गरेका छन्।
सुरक्षा चुनौती र भावी योजना
हाल प्रविधिको विकाससँगै सामाजिक सञ्जालको दुरुपयोग (भ्रामक सूचना, अफवाह र घृणास्पद अभिव्यक्ति), धार्मिक-सांस्कृतिक विवाद, साइबर अपराध र सडक दुर्घटना मुख्य सुरक्षा चुनौतीका रूपमा देखा परेका छन्।
यी चुनौतीहरूलाई सम्बोधन गर्न कोशी प्रदेश प्रहरीले प्रविधिमैत्री सुरक्षा प्रणाली, सीमा सुरक्षामा कडाइ, समुदाय-प्रहरी साझेदारी र सडक दुर्घटना बढी हुने ‘ब्ल्याक स्पट’ क्षेत्रहरूको पहिचान गरी दुर्घटना न्यूनीकरण गर्ने रणनीति लिएको छ।
