विराटनगर, साउन २४ । पूर्वी नेपालका तीन जिल्ला (मोरङ, सुनसरी र झापा) मा प्रहरीले चलाएको विशेष अभियानका क्रममा ठूलो मात्रामा लागूऔषधसहित १० जना पक्राउ परेका छन्। साउन २३ गते सञ्चालित कारबाहीका क्रममा ४१८ किलो गाँजा र १ हजार ५४ मिलिग्राम भन्दा बढी ब्राउन सुगर बरामद गरिएको छ।
इलाका प्रहरी कार्यालय महेन्द्रनगरको टोलीले बराहक्षेत्र नगरपालिका-१, गुप्तबराहस्थित सडकमा चेकजाँच गर्दा चतरातर्फ आउँदै गरेको प्र.१-०२-००२ च ४८५१ नम्बरको कारभित्र २२ प्लाष्टिकका पोकामा लुकाइराखेको ४१८ किलो गाँजा फेला पारेको हो। सोही क्रममा कार चालक धरान-१३ का ३४ वर्षीय थमन राई र सवार मानेभञ्ज्याङ-५ ओखलढुङ्गाकी २२ वर्षीया जिवनी राई पक्राउ परेका छन्।
साथै, स्कर्टिङमा रहेको को ११ प ५६०१ नम्बरको मोटरसाइकल चालक मोरङ कटहरी-३ का २६ वर्षीय अमर कामत र पछाडि सवार ३८ वर्षीय शंकर चौधरीलाई पनि प्रहरीले नियन्त्रणमा लिएको छ।
धरानबाट ९३० मिलिग्राम ब्राउन सुगरसहित ३ जना पक्राउ
सुनसरीकै धरान उपमहानगरपालिका-११ स्थित रिटिङ टोलबाट अस्थायी प्रहरी चौकी रेल्वेको टोलीले ९३० मिलिग्राम ब्राउन सुगरसहित तीन जनालाई पक्राउ गरेको छ। पक्राउ पर्नेमा धरान-११ का ३२ वर्षीय उमेश कार्की, ३३ वर्षीय रुद्र मगर र धरान-१६ की २४ वर्षीया स्वास्तिका गुरुङ रहेका छन्।
विराटनगरबाट १०० ग्राम भन्दा बढी ब्राउन सुगर बरामद
मोरङको विराटनगर महानगरपालिका-१५, मण्ठा पोखरी क्षेत्रबाट इलाका प्रहरी कार्यालय रानी र लागू औषध नियन्त्रण ब्युरो विराटनगरको संयुक्त टोलीले १०० ग्राम ६०० मिलिग्राम ब्राउन सुगरसहित एक जनालाई पक्राउ गरेको छ। पक्राउ पर्नेमा विराटनगर-१५ का ३१ वर्षीय मोहमद हुसेन रहेका छन्।
झापामा सिटी सफारीबाट ५३ ग्राम ब्राउन सुगर बरामद
झापाको मेचीनगर नगरपालिका-८, सरस्वती टोलमा ईटाभट्टाबाट धुलाबारीतर्फ जाँदै गरेको प्र.१-०१-००२ ह ३५६९ नम्बरको सिटी सफारीलाई इलाका प्रहरी कार्यालय काँकरभिट्टा र लागू औषध नियन्त्रण ब्युरोको टोलीले चेकजाँच गर्दा ५३ ग्राम ४४० मिलिग्राम ब्राउन सुगर फेला पारेको छ।
उक्त घटनामा सफारी चालक मोरङ पथरी शनिश्चरे-५ का २५ वर्षीय गणेश चौधरी र झापा धुलाबारीका २३ वर्षीय सोमनाथ राजवंशी पक्राउ परेका छन्।पक्राउ परेका सबै १० जनामाथि सम्बन्धित जिल्ला प्रहरी कार्यालयहरूबाट लागूऔषध ऐनअन्तर्गत थप अनुसन्धान भइरहेको छ।
