काठमाडौँ, २२ साउनः एनएमबि म्युचुअल फण्डअन्तर्गत योजना व्यवस्थापक एनएमबि क्यापिटल लिमिटेडद्वारा सञ्चालित खुल्लामुखी योजना ‘एनएमबि सरल बचत फण्ड-इ’ (NMB Saral Bachat Fund-E) ले इकाईधनीहरूका लागि नगद प्रतिफल घोषणा गरेको छ।
कम्पनीको निर्णय अनुसार आर्थिक वर्ष २०८२/८३ का लागि २०८३ आषाढ मसान्तमा कायम कायम इकाई पुँजी रु. ४ अर्ब ८१ करोड १७ लाख ५५ हजार ९७८ रुपैयाँ ४० पैसाको ५.२५ प्रतिशत (कर सहित) का दरले हुन आउने रु. २५ करोड ६८ लाख १७ हजार १८८ रुपैयाँ ८७ पैसा नगद प्रतिफल वितरण गरिनेछ।
उक्त घोषित प्रतिफल प्राप्त गर्नका लागि मिति २०८३ श्रावण २१ गतेसम्म इकाईधनी दर्ता किताबमा नाम कायम रहेका लगानीकर्ताहरू मात्र योग्य हुने क्यापिटलले जनाएको छ।
पुनर्लगानीको विकल्प र वितरण प्रक्रिया
प्रतिफल वितरण प्रक्रियालाई पारदर्शी, व्यवस्थित र नियामकीय मापदण्ड अनुसार सम्पन्न गरिने योजना व्यवस्थापकले स्पष्ट पारेको छ। लाभांश पुनर्लगानी योजना (Dividend Reinvestment Plan – DRIP) रोजेका इकाईधनीहरूले प्राप्त प्रतिफल रकमबाटै थप इकाइहरू खरिद गरी आफ्नो लगानी विस्तार गर्न सक्नेछन्। DRIP मा सहभागी नहुने इकाईधनीहरूको हकमा भने नियमानुसार लाग्ने कर कट्टी गरी बाँकी रकम सिधै सम्बन्धित बैंक खातामा जम्मा गरिनेछ।
एनएमबि क्यापिटलले दीर्घकालीन लगानी व्यवस्थापन, जोखिम नियन्त्रण र स्थिर प्रतिफलमार्फत लगानीकर्ताको विश्वास सुदृढ बनाउने प्रतिबद्धता व्यक्त गरेको छ। आगामी दिनमा पनि बजारको अवस्था र लगानीकर्ताको हितलाई ध्यानमा राख्दै प्रभावकारी फण्ड व्यवस्थापनलाई निरन्तरता दिइने कम्पनीको भनाइ छ।
साथै, प्रतिफल सहज रूपमा प्राप्त गर्नका लागि आफ्ना बैंक विवरण तथा व्यक्तिगत अभिलेख अद्यावधिक राख्न इकाईधनीहरूलाई अनुरोध गरिएको छ।
