:
भारत बिहारको सीतामढीमा रासायनिक मल खरिद गर्न जाँदा पक्राउ परेका सर्लाहीका दुई नेपाली सर्वसाधारण एक महिनापछि रिहा भएका छन्।
रिहा हुनेहरूमा सर्लाहीको बलरा नगरपालिका–५ निवासी सुरेशप्रसाद सिंह र नागेन्द्रप्रसाद सिंह रहेका छन्। खेतीपातीका लागि मल किनेर घर फर्किने क्रममा उनीहरूलाई एक महिनाअघि भारतीय प्रहरीले सीमा क्षेत्रबाट पक्राउ गरेको थियो।
स्थानीय अदालतले उनीहरूलाई जमानतमा रिहा गर्न आदेश दिएको सुरेशप्रसाद सिंहका छोरा अविनाश सिंहले जानकारी दिएका हुन्।
न्यायाधीश बिदामा बस्दा रिहाइमा ढिलाइ
अदालतबाट जमानतको आदेश भइसके पनि कानुनी प्रक्रियाका कारण उनीहरू बिहीबार मात्रै घर आइपुग्ने भएका छन्।
“उहाँहरू यसअघि नै छुट्नेवाला हुनुहुन्थ्यो, तर त्यहाँका न्यायाधीश बिदामा बसेका कारण प्रक्रियामा केही ढिलाइ भएको हो। अदालतले जमानतमा छाड्न आदेश दिए पनि भारतकै कुनै व्यक्ति साक्षी बस्नुपर्ने प्रावधान भएकाले भोलि (बिहीबार) घर ल्याइनेछ,” अविनाश सिंहले भने।
नेपालमा खेतीका बेला रासायनिक मलको तीव्र अभाव भएपछि सीमावर्ती क्षेत्रका किसानहरू जोखिम मोलेरै भारतीय बजारबाट मल खरिद गरी ल्याउन बाध्य हुँदै आएका छन्।
