काठमाडौँ, २० साउनः सरकारले सुनसरी र सिरहा जिल्लामा भएका प्रदर्शनका क्रममा ज्यान गुमाएका व्यक्तिका परिवारलाई राहत तथा घाइतेहरूको निःशुल्क उपचारको व्यवस्था गर्ने निर्णय गरेको छ।
बुधबार सिंहदरबारस्थित प्रधानमन्त्री तथा मन्त्रिपरिषद्को कार्यालयमा बसेको बैठकले उक्त निर्णय गरेको हो। मन्त्रिपरिषद्का निर्णय सार्वजनिक गर्दै सरकारका प्रवक्ता एवं शिक्षा तथा खेलकुद मन्त्री सस्मित पोखरेलले प्रदर्शनका क्रममा घाइते भएकाहरूको उपचार खर्च सरकारले व्यहोर्ने र मृतकका परिवारलाई उचित राहत तथा क्षतिपूर्ति प्रदान गरिने जानकारी दिए।
गत साउन १० गते सुनसरी र सिरहामा भएको प्रदर्शन र अनपेक्षित घटनामा परी सुनसरीमा ३ जना र सिरहामा १ जना गरी कुल ४ जनाको मृत्यु भएको थियो। उक्त घटनामा दर्जनभन्दा बढी सर्वसाधारण तथा प्रदर्शनकारी घाइते भएका थिए।
सरकारी निर्णयसँगै पीडित परिवारले राहत पाउने र घाइतेहरूको उपचार प्रक्रिया सहज हुने अपेक्षा गरिएको छ।
