काठमाडौं, ११ असार । उपराष्ट्रपति रामसहायप्रसाद यादव रुसको राष्ट्रिय दिवसका अवसरमा बुधबार साँझ काठमाडौंमा आयोजित विशेष स्वागत समारोहमा सहभागी भएका छन्।
समारोहका अवसरमा नेपालका लागि रुसी राजदूत अलेक्सेई भ्लादिमिरोभिच सुरोभ्त्सेभले असंलग्नता तथा पञ्चशीलका सिद्धान्तमा आधारित नेपालको सार्वभौम परराष्ट्र नीतिलाई रुसले सधैँ उच्च मूल्याङ्कन गर्दै आएको उल्लेख गरे। नेपाल र रुसबीचको सुमधुर सम्बन्धका बारेमा चर्चा गर्दै राजदूत सुरोभ्त्सेभले आगामी साउन ४ गते (जुलाई २० मा) दुई देशबीच कूटनीतिक सम्बन्ध स्थापना भएको ७०औँ वर्ष पूरा हुन लागेको जानकारी दिए।
द्विपक्षीय सम्बन्धका सन्दर्भमा यो वर्ष विशेष रहेको बताउँदै उनले यस ऐतिहासिक अवसरमा कूटनीतिक सम्बन्ध मात्र नभई सद्भाव, पारस्परिक सम्मान र जनस्तरको सम्बन्धमा आधारित दीर्घकालीन मैत्रीको ७० वर्ष पूरा भएको उत्सव मनाउन लागिएको स्पष्ट पारे।
नेपाल र रुसबीच पारस्परिक विश्वास र समझदारीको बलियो जग रहेको स्मरण गर्दै राजदूत सुरोभ्त्सेभले आगामी दिनमा दुई देशबीचको मित्रता र बहुआयामिक सहकार्य अझ सुदृढ बन्दै जाने विश्वास व्यक्त गरे।
