चितवन, असार ६ । सत्तारुढ राष्ट्रिय स्वतन्त्र पार्टी (रास्वपा) को पहिलो ऐतिहासिक राष्ट्रिय महाधिवेशन आजदेखि चितवनको भरतपुरमा सुरु हुँदैछ। महाधिवेशनका लागि देशभरका ७७ वटै जिल्ला तथा ३८ भन्दा बढी देशमा रहेका वैदेशिक शाखाहरूबाट गरी २,५०० देखि ३,००० को हाराहारीमा प्रतिनिधि तथा पर्यवेक्षकहरू चितवन आइपुगेका छन्। भरतपुरको गेस्ट हाउस चौरमा उद्घाटन समारोह र चितवन उद्योग संघको औद्योगिक प्रदर्शनी केन्द्रमा बन्द सत्र सञ्चालन गर्ने गरी महाधिवेशनको सम्पूर्ण तयारी पूरा भएको छ। महाधिवेशन सम्पन्न गर्न करिब ४ करोड रुपैयाँ खर्च हुने अनुमान गरिएको छ, जुन प्रतिनिधिहरूको शुल्क र पार्टी सदस्य तथा शुभेच्छुकहरूको सहयोगबाट जुटाइएको पार्टीले जनाएको छ। रास्वपाले कुल प्रतिनिधिहरूमध्ये कम्तीमा एक तिहाइ (३३ प्रतिशत) महिला सहभागिता अनिवार्य गरेको छ।
पार्टीभित्र एकताको सन्देश दिन र राजनीतिक सन्तुलन मिलाउन मुख्य दुई शीर्ष पदहरूमा पुरानै नेतृत्व दोहोरिने निश्चित भएको छ। पार्टीका संस्थापक तथा मुख्य चेहरा भएकाले रवि लामिछाने नै पुनः सभापति बन्नेमा पार्टीभित्र पूर्ण सहमति बनेको छ। हालैका राजनीतिक उतारचढावका बीच पनि पार्टी पंक्तिमा उनको विकल्प खोजिएको छैन। त्यस्तै, आमनिर्वाचनमा पार्टीलाई ऐतिहासिक सफलता दिलाउँदै हाल प्रधानमन्त्रीको रूपमा सरकारको नेतृत्व गरिरहेका बालेन्द्र शाह (बालेन) लाई वरिष्ठ नेताको रूपमा निरन्तरता दिइँदैछ। संशोधित विधान अनुसार पदाधिकारी संख्या १३ बाट बढाएर १९ पुर्याइएको छ। शीर्ष दुई पद सर्वसम्मत भए पनि बाँकी शक्तिशाली पदाधिकारी र केन्द्रीय सदस्य पदहरूमा नेताहरूबीच निकै ठूलो आन्तरिक दौडधूप र रस्साकस्सी चलिरहेको छ।
नयाँ विधान अनुसार एक महिलासहित ३ जना उपसभापति चयन हुनेछन्। हालका उपसभापति डीपी अर्याल प्रतिनिधि सभाको सभामुख बनेकाले उनी नेतृत्वको दौडमा छैनन्। हालका अर्थमन्त्री डा. स्वर्णिम वाग्ले उपसभापतिमा दोहोरिने लगभग निश्चित छ। महिला उपसभापति कोटाका लागि पूर्वउपसभामुख इन्दिरा राना मगर, हालकी कोषाध्यक्ष लीमा अधिकारी र सहप्रवक्ता एवं बहालवाला मन्त्री प्रतिभा रावल मुख्य दौडमा छन्। यस्तै, संसदीय दलका उपनेता गणेश पराजुली र समीक्षा बाँस्कोटाले पनि उपसभापतिमा आकांक्षा देखाएका छन्। हालका महामन्त्री कविन्द्र बुर्लाकोटीलाई उपसभापतिमा बढुवा गर्ने कि पुरानै पदमा राख्ने भन्ने बहस जारी छ।
त्यसैगरी, २ जना महामन्त्री पदका लागि पनि तीव्र प्रतिस्पर्धा छ। डा. मुकुल ढकालको बर्खास्तीपछि रिक्त स्थानहरू र नयाँ समीकरणले यो पदलाई निकै आकर्षक बनाएको छ। हाल कार्यरत महामन्त्रीहरूमध्ये भूपदेव शाह पुनः सोही पदमा दोहोरिने सम्भावना बलियो छ। सञ्चार र संगठनमा प्रभावशाली भूमिका खेलेका प्रवक्ता मनिष झा र बहालवाला मन्त्री सोविता गौतम महामन्त्रीको दौडमा अग्रपंक्तिमा छन्। परराष्ट्र मन्त्री शिशिर खनाल र सचिवालय सदस्य दीपक बोहराले पनि महामन्त्रीका लागि आन्तरिक लबिइङ तीव्र पारेका छन्।
विधानमा एक महिलासहित ५ जना सहमहामन्त्री रहने व्यवस्था गरिएको छ। वर्तमान सहमहामन्त्री विपिन आचार्यले महामन्त्रीमा बढुवा हुन चाहेका छन् भने विराजभक्त श्रेष्ठ, तोसिमा कार्की, गणेश कार्की, हरि ढकाल, प्रकाश चन्द्र परियार लगायतका युवा नेताहरूले सहमहामन्त्रीमा दाबी गरिरहेका छन्। कोषाध्यक्ष लीमा अधिकारीले उपसभापतिमा इच्छा देखाएकाले कोषाध्यक्ष र सहकोषाध्यक्ष पदमा नयाँ र व्यावसायिक पृष्ठभूमिका व्यक्तिलाई ल्याउने तयारी छ।
रास्वपा सचिवालय बैठकले विधान संशोधन गर्दै १९ मध्ये ११ जना पदाधिकारीहरू सभापतिले मनोनीत गर्न सक्ने खुकुलो व्यवस्था प्रस्ताव गरेको छ। यस अनुसार सभापतिले १ उपसभापति, १ महामन्त्री, २ सहमहामन्त्री, प्रवक्ता, ३ सहप्रवक्ता, १ कोषाध्यक्ष र २ सहकोषाध्यक्ष मनोनीत गर्न पाउनेछन्। विवेकशील साझा, थारुहाट आन्दोलन र अन्य स्वतन्त्र समूहबाट पार्टीमा भर्खरै समाहित भएका नेताहरूलाई चुनावी प्रतिस्पर्धा विना सिधै नेतृत्वमा समायोजन गर्न सजिलो होस् भन्नका लागि यो व्यवस्था गरिएको बुझिएको छ। त्यसैले धेरै पदहरूमा चुनावी प्रतिस्पर्धा भन्दा पनि आन्तरिक समझदारी र मनोनयनबाटै पदको बाँडफाँट हुने सम्भावना बढी देखिएको छ।
