काठमाडौँ । नेपाली कम्युनिस्ट पार्टीले फागुन २१ मा सम्पन्न प्रतिनिधिसभा सदस्य निर्वाचनमा अस्वाभाविक चुनावी परिणाम आउनुमा आन्तरिक र बाह्य कारण प्रमुख भएको निष्कर्ष निकालेको छ । बिहीबार केन्द्रीय कार्यालय पेरिसडाँडामा बसेको केन्द्रीय कार्य संयोजन समितिको बैठकमा नसोचेको परिणाम आउनुमा आन्तरिक र बाह्य कारणलाई प्रमुख आधार बनाएको हो ।
साबिक नेकपा माओवादी केन्द्र, नेकपा एकीकृत समाजवादी सहित २५ घटक मिलेर बनेको नेकपाले चुनावमा निर्णायक शक्ति बन्ने आन्तरिक विश्लेषण थियो । तर प्रत्यक्ष र समानुपातिक गरी जम्मा १७ सिट जितेपछि नेकपाले बैठकमा हारको समीक्षा गरेको हो ।
आन्तरिक कारणमा क्रान्तिपछि आर्थिक सामाजिक रूपान्तरण नहुनु, सङ्गठनात्मक समायोजन नहुनु, विचारधारात्मक काम नहुनु, युवाहरू पार्टीमा आबद्ध नहुनु, वाम शक्ति एकजुट नहुनु, परिवर्तनको महत्त्व बुझाउन नसक्नु, भएको कामको प्रचार नहुनु, सिद्धान्त र व्यवहारमा अन्तर हुनु, अवसरवादी प्रवृत्ति र व्यक्तिवादी कार्यशैली, प्राविधिक जनशक्ति र स्रोत साधनको कमी र विकल्पको रूपमा प्रस्तुत हुन नसक्नु रहेका छन् ।
बाह्य कारणमा पुराना दल विरोधी अभियान, वाम शक्तिमाथि प्रहार, भूराजनीतिक तथा बाह्य शक्ति केन्द्रको चलखेल, डिजिटल सुनामी, लोकप्रियतावादी शक्तिको प्रचार र प्रहार विदेशमा बस्ने नेपालीको भूमिकालाई आधार बनाइएको छ ।
