विराटनगर । नेकपा (माओवादी केन्द्र) का नेता तथा पूर्वमन्त्री शिवकुमार मण्डलले पार्टी छाडेर नयाँ अभियान घोषणा गरेका जनार्दन शर्माको साथ छाडेका छन् ।
यसअघि मण्डल नेता जनार्दन शर्माको ‘प्रगतिशील राष्ट्रिय अभियान’मा जोडिने सार्वजनिक भएको थियो । मण्डलले तत्कालिन पार्टी अध्यक्ष प्रचण्डको विषयमा शर्माले राखेका विषयमा समर्थन गर्दै आएका थिए ।
मण्डलले आफू नेपाली कम्युनिष्ट पार्टीमै रहने बताए । ‘मैले अहिले एकता प्रक्रियामै रहने निर्णय गरेको छु,’ मण्डलले भने, ‘संयोजक प्रचण्डका कतिपय विषयमा राखिएका फरक मत र विचारलाई यही पार्टीभित्रै रहेर बहस गरिरहन्छु ।’ मण्डलले अहिले विभाजन भन्दा एकताकै आवश्यकता रहेको पनि बताए ।
कोशी प्रदेशमा सुदन किराँतीले मात्रै जनार्दन शर्मालाई साथ दिएका छन् ।
यस अघि शुरुमा जनार्दन शर्मासँगै पत्रकार सम्मेलनमा देखिएकी अञ्जना विशंखे पनि मुलधारमा फर्किएकी छन् ।
