२ कात्तिक, काठमाडौं । सरकारले निर्वाचनको पूर्व तयारी शुरु गरेको छ । यस क्रममा आज सुरक्षा समितिको बैठक बस्दै छ ।
हिजो राष्ट्रपतिले प्रधानमन्त्री सहित चार वटै सुरक्षा निकायका प्रमुखसँग छलफल गर्दै निर्वाचनको वातावरण बनाउन लागि पर्न भनेका थिए । लगत्तै आज सुरक्षा समितिको बैठक बोलाईएको हो ।
यस अघि निर्वाचन आयोगले पनि दलहरुसँग छलफल गरेको छ भने राष्ट्रपतिले दल र जेनजी प्रतिनिधिहरुसँग छलफल गरीसकेका छन् ।
गृहमन्त्री अध्यक्ष रहने समितिमा गृह र रक्षा सचिवका साथै चारवटा सुरक्षा निकायको प्रतिनिधि सहभागी हुन्छन् ।
प्रधानमन्त्री कार्कीको सचिवालयले जारी गरेको प्रेस नोटका अनुसार, उक्त बैठकले एकीकृत सुरक्षा योजनाको समीक्षा गर्नुका साथै त्यसको समीक्षा गरी नीतिगत निर्देशन दिनेछ ।
यसका साथै गृह मन्त्रालयको शान्ति सुरक्षा र अपराध नियन्त्रण महाशाखा प्रमुखको नेतृत्वमा अर्को एकीकृत निर्वाचन सुरक्षा समिति गठन भएको छ । नयाँ सरकार गठन हुनासाथ बनेको समितिले सुरक्षा योजना कार्यान्वयनका लागि जिल्लाहरुसँग समन्वय गर्नेछ ।
त्यसैगरी हरेक जिल्लामा सीडीओको नेतृत्वमा जिल्ला एकीकृत निर्वाचन सुरक्षा समिति बनाई कार्यान्वयन थालिएको प्रेस नोटमा उल्लेख छ ।
प्रधानमन्त्री कार्कीले सहज राजनीतिक निकासका लागि निर्वाचन सम्पन्न गर्न सबै पक्षलाई आग्रह गरेकी छन् । प्रधानमन्त्रीको सचिवालयले जारी गरेको प्रेस नोटमा ‘सरकारले निर्वाचनलाई प्राथमिकतामा राखेर आफ्ना गतिविधि केन्द्रित गरेको’ उल्लेख छ ।
‘हामी पूर्ण क्षमताका साथ निर्वाचन तयारीमा जुटेका छौँ । एकीकृत निर्वाचन सुरक्षा योजना तीव्र गतिमा बन्दै छ,’ गृहमन्त्री अर्यालको भनाइ उदृत गर्दै प्रेस नोटमा उल्लेख छ, ‘निर्वाचन आयोगसँग पनि सघन छलफल र समन्वय भइरहेको छ । सुरक्षा निकायहरूलाई आवश्यक स्रोतसाधनको कुनै कमी नहुने गरी काम भइरहेको छ ।’
जेनजी आन्दोलनपछि कार्की नेतृत्वमा बनेको नयाँ सरकारले पहिलो दिन नै फागुण २१ गते निर्वाचन गर्ने घोषणा गरेको थियो ।
एमाले र काँग्रेसले सरकारले निर्वाचनको वातावरण नबनाएको भन्दै आलोचना गरीरहेका छन् ।
एमालेले औपचारीक रुपमै संसद पुनस्थापनाको माग गरेको छ ।
