काठमाडौं, २४ भदौ।
जेनजी युवाहरुको आन्दोलन आज पनि काठमाडौंमा निरन्तर जारी छ। सोमबारको घटनापछि मंगलबार बिहानैदेखि नयाँ बानेश्वर चोक आन्दोलनकारी युवाहरुले नाराबाजीसहित कब्जा गरेपछि त्यहाँ फेरि तनावपूर्ण अवस्था सिर्जना हुने अवस्था देखिएको छ ।
प्रदर्शनमा मृतकका आफन्तसमेत सहभागी भएका छन्। उनीहरुले “केपी ओली राजीनामा दे”, “बच्चा मार्न पाइँदैन”, “भ्रष्टलाई देश निकाला गर” जस्ता नारा लगाएका छन्। आक्रोशित भीडले चोकमा विरोध प्रदर्शन गरिरहेको छ ।
यसबीच, प्रहरीले सुरक्षा घेराबन्दी थप गर्दै माइकिङमार्फत कफ्यु आदेशको जानकारी गराइरहेको छ। तर, प्रदर्शनकारी हट्न तयार भएका छैनन् । उनीहरुले चर्को नाराबाजी सहित प्रदर्शन गरिरहेका छन् ।
बानेश्वर क्षेत्रको सडकमा छिटफुट सवारीसाधन मात्र गुडिरहेका छन् भने पसल र व्यापारिक प्रतिष्ठान बन्द भएका छन्।
आन्दोलन चर्कँदै गएपछि बानेश्वर वरपरका शंखमुल, मिनभवन र शान्तिनगर क्षेत्रमा पनि ठूलो संख्यामा सुरक्षाकर्मी परिचालन गरिएको छ।
