काठमाडौँ । प्रधानमन्त्री केपी शर्मा ओलीले अहिलेको सत्ता सरकारलाई कसैले हल्लाउन नसक्ने दावी गरेका छन् ।
उनले सरकार, एमाले र सत्ता गठबन्धनलाई कसैले हल्लाउन नसक्ने जिकिर गरे ।
काठमाडौंको दरबारमार्गमा भएको एमालेको जनजागरण सभालाई सम्बोधन गर्दै एमाले अध्यक्ष समेत रहेका प्रधानमन्त्री ओलीले वर्तमान सरकार देश र जनताको पहरेदारको रुपमा रहेको दाबी गरे ।
उनले एमाले र नेपाली कांग्रेस प्रतिस्पर्धी पार्टी भएपनि अहिले मुलुकका लागि एक ठाँउमा उभिएको बताए ।
एमाले र कांग्रेस प्रतिस्पर्धी पार्टी हुन् । तर कांग्रेस र एमाले किन एक ठाउँमा छन् किन भने अहिले हामीबीचको प्रतिस्पर्धाभन्दा एकता चाहिन्छ । अराजकताको स्थिति ल्याउन खोजिएको छ । समाजलाई भाँड्न खोजिएको छ । त्यसैले हामी मिलेका छौ । नेपाली जनताले ल्याएको लोकतन्त्र र सार्वभौम जनताको हैसियतविरुद्ध षड्यन्त्र भइरहेको छ ।
उनले आफु मंसीर १७ गतेदेखि चीन भ्रमणमा जान लागेको जानकारी दिए ।
चीन भ्रमणबारे अफबाह फैलाईएको भन्दै उनले आलोचना गरे ।
