२९ साउन, काठमाडौं । प्रतिनिधि सभा सदस्य गोमालाभ सापकोटालाई हटाउने जनमत पार्टीको पत्र संघीय संसद सचिवालयबाट दोस्रो पटक पनि अस्वीकृत भएको छ ।
संसद सचिवालयका अनुसार एक साता अगाडि जनमत पार्टीले सापकोटालाई कारबाही गरेको पत्र दर्ता गरेको थियो ।
उक्त पत्रमा यसअघि नै कारबाही हुन सक्ने आधार नदेखिएको भनेर सभामुख देवराज घिमिरेबाट अस्वीकृत भएको भन्दै नयाँ निर्णय लिन नपर्ने जवाफ संसदका महासचिव पद्मप्रसाद पाण्डेयले पठाएका छन् ।
यसअघि फागुन २०८० मा जनमत पार्टीले समानुपातिक सांसद सापकोटालाई पार्टीले निष्कासन गरेको पत्र संसद सचिवालयमा पठाएको थियो । उक्त पत्र पार्टीको लेटरहेडमा रहेको भनेर अस्वीकृत भएको थियो ।
त्यसपछि २०८० साल फागुन २७ गते जनमत पार्टीको संसदीय दलले सापकोटालाई पार्टीले निष्कासन गरेको पत्र संसद सचिवालयमा पठाएको थियो । उक्त पत्रमा सापकोटाले पार्टीको निर्देशन नमानेको र स्पष्टीकरण सोध्ने, सफाइ पेश गर्ने लगायतका प्रक्रिया पूरा गरेर कारबाही गरेको दाबी गरिएको थियो ।
तर सभामुख घिमिरेले राजनीतिक दल सम्बन्धी ऐन अनुसार सापकोटालाई जनमत पार्टीले गरेको कारबाही नमिलेको भनेर सदर गरेनन् ।
यही साउन दोस्रो साता जनमत पार्टीले फेरि सापकोटालाई पार्टीबाट निष्काशन गरिएको भन्दै कारबाही सदरका लागि संसद सचिवालयमा पत्र पठाएको थियो ।
यसपटक सुभामुख घिमिरेकहाँ नपुग्दै सांसद सापकोटालाई सांसदबाट हटाउने जनमतको पत्र अस्वीकृत भएको छ ।
अध्यक्ष सिके राउतले सापकोटालाई पटक पटक कार्बाही गर्दै हटाउन खोजे पनि उनको उनको पद सुरक्षित रहेको छ ।
