साउन २३ काठमाण्डौँ । आज दिउँसो दुर्घटना भएको एयर डाइनेस्टीको हेलिकप्टरमा सवार पाँचै जनाको मृत्यु भएको छ । बुधबार १ बजेर १४ मिनेटमा त्रिभुवन विमानस्थलबाट ४ चिनियाँ यात्रु लिएर उडेको उक्त हेलिकप्टर नुवाकोट शिवपुरी गाउँपालिका–७ सूर्यचौर डाँडा र गुर्जेभन्ज्याङको बीचमा हेलिकप्टर दुर्घटनाग्रस्त भएको थियो ।
प्रहरीका अनुसार घटनास्थलबाट चार पुरुष र एक महिलाको शब फेला परेको छ ।
उक्त हेलिकप्टर क्याप्टेन अरुण मल्लले उडाएका थिए भने ४ चिनियाँ पर्यटक स्याफ्रुबेंसी जाँदै थिए । एयर डाइनेस्टीको ४ चिनियाँ पर्यटक छाडेर फेरि विदेशी नागरिक ल्याउने तालिका बनाएको थियो ।
मृत्यु हुनेमा क्याप्टेन अरुण मल्ल र चिनियाँ नागरिकहरू जुताड ताङ, ताइ ली, जेमिङ जी र यीयाड वु रहेका छन् । मृत्यु हुनेमा ४ पुरुष र १ महिला छन् । प्रत्यक्षदर्शीका अनुसार हेलिकप्टर रुखमा ठोक्किएर आगो लाग्दै झरेको थियो ।
दुर्घटनाको कारणबारे पत्ता लागेको छैन । उक्त उडान हुँदा भिजिविलिटी ५ किलोमिटर तथा सामान्य रहेको थियो ।
घटनाको खबर आउनेवित्तिसकै खोजीमा अर्को हेलिकोप्टर पठाइएको थियो । अहिले शसस्त्र सुरक्षा बल र स्थानीयले घटनास्थलमा उद्धार र खोजी कार्य जारी राखेका छन् ।
