काठमाडौँ असार ३०। नयाँ सत्ता समीकरण पछि आज एमाले अध्यक्ष केपी ओली प्रधानमन्त्रीमा नियुक्त हुँदैछन् ।
राष्ट्रपति रामचन्द्र पौडेलले आज ओलीलाई नयाँ प्रधानमन्त्रीको नियुक्ति गर्ने भएका छन् । उनले नयाँ सरकार गठनका लागि तोकेको समयसीमा सकिएपछि प्रधानमन्त्रीको नियुक्ति र शपथको प्रक्रिया अघि बढाउने प्रेस सल्लाहकार किरण पोखरेलले जानकारी दिए।
राष्ट्रपति पौडेलले नेपालको संविधानको धारा ७६ को उपधारा (२) बमोजिम प्रधानमन्त्री पदमा नियुक्ति गर्ने प्रयोजनका लागि आज साँझ ५ बजेभित्र आफ्नो दाबी पेस गर्न शुक्रबार आह्वान गरेका थिए ।
सो आह्वानअनुसार नेपाल कम्युनिष्ट पार्टी (एमाले) का अध्यक्ष केपी शर्मा ओलीले नेपाली कांग्रेसको समर्थनमा प्रधानमन्त्रीका लागि शुक्रबार नै दाबी पेस गरिसकेका छन् । ओली चौथो पटक नेपालका प्रधानमन्त्री बन्न लागेका हुन् ।
ओली आज प्रधानमन्त्री नियुक्त भए पनि शपथ भने भोली मात्र हुनेछ ।
