मंसीर २४ काठमाण्डौँ । नेकपा एमालेले नेता घनश्याम भुषाल, प्रभु शाह सहित सात केन्द्रीय सदस्यलाई साधारण सदस्य समेत नरहने गरी निष्कासन गरेको छ ।
पार्टी केन्द्रीय कार्यालय च्यासलमा शनिबार बसेको सचिवालय बैठकले निर्वाचनमा पार्टीविरोधी गतिविधिमा लागेको भन्दै भुसाल र साहलाई हटाएको हो।
उनीहरु दुवै एमालेको स्थायी समिति सदस्य थिए। भुसाललाई टिकट नदिइएपछि उनले चुनावअघि नै पार्टी छाडेका थिए भने साहले टिकट बाँडफाँटमा असहमति जनाउँदै स्वतन्त्र उम्मेदवारी दिएका थिए।
त्यसैगरी बैठकले सोही अभियोगमा केन्द्रीय कमिटीका सदस्यहरु उपेन्द्र साह, कुन्दन कुशवाह, रामप्रित राम, बद्री न्यौपाने, रिता साह, गंगा चौधरी र टेकबहादुर बलम्पाटीलाई पनि हटाएको उपमहासचिव एवम् प्रचार विभाग प्रमुख पृथ्वीसुब्बा गुरुङले जानकारी दिए।
एमालेले चुनावमा पार्टी विरोधी गतिविधिमा संलग्न भएको भन्दै पार्टीको केन्द्रीय निकायमा रहेका वाङ्दी शेर्पा, खेम सुवेदी, भक्तबहादुर अधिकारी, लक्ष्मी साहलाई पनि पार्टीको जिम्मेवारीबाट हटाएको छ। चुनावमा पार्टी विरोधी गतिविधिमा लागेको आरोपमा जैतुन खातुनलाई प्रतिनिधि सभाको समानुपातिकतर्फको सूचीबाट हटाउने काम पनि गरिएको प्रचार विभाग प्रमुख गुरुङले जनाए।
एमालेले निर्वाचन विरोधी गतिविधिमा लागेका अन्य तहका नेताहरुलाई पनि कारबाही गर्ने तयारी रहेको जनाएको छ।
