विराटनगर, १६ माघ ।
सञ्चार तथा सूचना प्रविधि मन्त्री गोकुल प्रसाद बास्कोटाले पत्रकारहरुले जाँच दिनुपर्ने व्यवस्था अनावश्यक रहेकाले जाँच दिने व्यवस्था हटाउने तयारी भईरहेको बताउनुभएको छ ।
बिहिवार विराटनगरमा सन्चारकर्मीहरुसँग कुरा गर्दै उहाँले क्षमता नभएको संस्थाबाट जाँच लिनु अनुपयुक्त देखिएकाले जाँच लिने व्यवस्था हटाउने बताउनु भयो । सरकार सन्चार क्षेत्रलाई सबल र व्यवस्थित बनाउने कार्यमा क्रियाशिल भईरहेको र यसै सँग सम्बन्धित ऐनहरु बनाउने प्रक्रिया थालिएको उहाँको भनाई छ ।
उहाँले एमसिसि विशुद्ध विकास सँग सम्बन्धित योजना भएकाले यसको विरोध गर्नुको कुनै तुक नभएको बताउनु भयो ।मन्त्री बास्कोटाले एमसिसीमा कुनै पनि विवादास्पद विषय नभएकाले सरकारले यसलाई संसदबाट पारित गराउन लागेको जानकारी दिनुभयो । उहाँले एमसिसी उर्जा र कनेक्टिभिटी संग जोडिएको र सामरिक महत्वको विषयहरु समावेश नभएको बताउदै अमेरिकन कंग्रेसले समेत पास गरेकाले संसदबाट पास गराउनुको विकल्प नभएको स्पष्ट पार्नुभयो ।
अर्को प्रसंगमा उहाँले कोरोना भाईरसबाट प्रभावित भएको चीनको बुहानमा रहेका नेपालीहरु सुरक्षित रहेकाले आत्तिनुपर्ने अवस्था नभएको बताउनु भयो । उहाँले त्यहाँका विद्याथीहरुले नेपाल फर्कन चाहे सरकारले फिर्ता ल्याउन कुटनीतिक प्रयास थाल्ने जानकारी दिनुभयो ।
सन्चारमन्त्री बास्कोटा सुनसरीको इटहरीमा स्थापना गरिएको नेपाल टेलिभिजनको पाँचौ च्यानल एनटिभी इटहरीको उद्घाटनमा सहभागि हुन विराटनगर पुग्नुभएको हो ।