काठमाडौ पुस २३ ।
सुनसरीको दुहबीस्थित पशुपति बिस्कुट उद्योग र वीरगञ्जको सरस्वती कपडा उद्योगमा गएराति आगलागी भएको छ । आगलागीबाट लाखौंको क्षति भएको दुवै उद्योगका सञ्चालकहरुले बताएका छन् ।
पशुपति विस्कुट उद्योगमा राति करिब ८ बजेदेखि लागेको आगो विभिन्न स्थानबाट गएका पाँच वटा वारुणयन्त्रको सहयोगमा मध्यरात साढे १२ बजेमात्र नियन्त्रणमा आएको इलाका प्रहरी कार्यालय इटहरीेले जनाएको छ ।सञ्चालकले लाखौंको क्षति भएको बताए पनि प्रहरीले भने क्षतिको पूर्ण विवरण आइनसकेको जनाएको छ ।
यस्तै वीरगञ्ज महानगरपालिकाको वडा नम्बर ५ रेशमकोठीस्थित जवाहिर गुप्ताको सरस्वती कपडा उद्योगमा पनि गएराति आगलागी हुँदा करोडौंको सामान जलेर नष्ट भएको छ ।
काम सकाएर उद्योग बन्द गरि बाहिरबाट ताल्चा लगाइसकेको अवस्थामा उद्योगमा अचानक आगलागी भएको सञ्चालकले बताएका छन् । आगलागीबाट तयारी कपडा, मेसिन लगायतका सामन जलेर नष्ट भएको छ ।
वीरगञ्ज महानगरपालिकाका २ वटा बारुण यन्त्र, नेपाल प्रहरी, सशस्त्र प्रहरी र स्थानीयको सहयोगमा आगो नियन्त्रणमा लिइएको हो ।